'పఠాన్' చిత్రంలో దీపిక భారీ ఎక్స్ పోజింగ్.. బాయ్ కాట్ సెగ.. షారుఖ్ ఫొటోలు, దిష్టిబొమ్మలు దగ్ధం!

బాలీవుడ్ బాద్షా షారుఖ్ ఖాన్ కు ఊహించని నిరసనలు ఎదురవుతున్నాయి. ఆయన తాజా చిత్రం 'పఠాన్'కు బాయ్ కాట్ సెగ తగిలింది. ఇప్పటికే బాయ్ కాట్ దెబ్బకు ఎన్నో బాలీవుడ్ సినిమాలు వసూళ్లు లేక చతికిల పడ్డాయి. ఇప్పుడు షారుఖ్ వంతు వచ్చింది. ఈ చిత్రంలో హిందువుల మనోభావాలను దెబ్బతీసే సన్నివేశాలు ఉన్నాయని కొన్ని హిందూ సంఘాలు ఆగ్రహం వ్యక్తం చేస్తున్నాయి. మధ్యప్రదేశ్ లోని బీజేపీ ప్రభుత్వం కూడా ఈ సినిమాపై తీవ్ర వ్యతిరేకతతో ఉంది. 

ఈ చిత్రంలో షారుఖ్ సరసన దీపికా పదుకుణే నటించింది. ఈ సినిమాలోని 'బేషరమ్' సాంగ్ ను ఇటీవలే విడుదల చేరారు. ఈ పాటలో దీపిక బికినీలు ధరించి, చాలా హాట్ గా నటించింది. భారీ ఎక్స్ పోజింగ్ చేసింది. ఈ పాటపై సంప్రదాయవాదులు తీవ్ర అభ్యంతరం వ్యక్తం చేస్తున్నారు. 

మరోవైపు, మధ్యప్రదేశ్ హోంమంత్రి నరోత్తమ్ మిశ్రా మాట్లాడుతూ, అభ్యంతరకర సన్నివేశాలను తొలగిస్తేనే రాష్ట్రంలో సినిమా ప్రదర్శనకు అనుమతిని ఇస్తామని, లేకపోతే నిషేధం తప్పదని హెచ్చరించారు. మరోవైపు దీపిక కాషాయ రంగు బికినీ ధరించడం కూడా బీజేపీ శ్రేణులను ఆగ్రహానికి గురిచేస్తోంది. ఈ క్రమంలో షారుఖ్ ఫొటోలను, దిష్టిబొమ్మలను నిరసనకారులు దగ్ధం చేశారు. మరి దీనిపై చిత్ర యూనిట్ ఎలా స్పందిస్తుందో వేచి చూడాలి.