మరో హారర్ థ్రిల్లర్ గా 'శబ్దం' .. టైటిల్ పోస్టర్ రిలీజ్!

తెలుగు తెరపైకి మరో హారర్ థ్రిల్లర్ రావడానికి రెడీ అవుతోంది. సెవెన్ జీ ఫిలిమ్స్ - ఆల్ఫా ఫ్రేమ్స్ వారు సంయుక్తంగా నిర్మించిన ఈ సినిమాకి, అరివళగన్ దర్శకత్వం వహించాడు. అరుణ్ పద్మనాభన్ ఫొటోగ్రఫీని అందిస్తున్న ఈ సినిమాకి జోసెఫ్ ఎడిటర్ గా ఉన్నాడు. ఈ సినిమాకి తమన్ సంగీతాన్ని అందిస్తుండటం విశేషం. 

ఆది పినిశెట్టి ప్రధానమైన పాత్రను పోషిస్తున్న ఈ సినిమాను, తెలుగు - తమిళ భాషల్లో రూపొందిస్తున్నారు. తెలుగులో 'శబ్దం' అనే టైటిల్ ను ఖరారు చేసి, కొంతసేపటి క్రితం టైటిల్ పోస్టర్ ను రిలీజ్ చేశారు. చెవి .. గబ్బిలాల నేపథ్యంలో డిజైన్ చేసిన టైటిల్ ఆసక్తిని రేకెత్తిస్తోంది.

గతంలో అరివళగన్ - ఆది పినిశెట్టి కాంబినేషన్ లో 'వైశాలి' అనే హారర్ థ్రిల్లర్ వచ్చింది. నీటిని ప్రేతాత్మ ఆవహించి ప్రతీకారం తీర్చుకోవడమనే కాన్సెప్టుతో వచ్చిన ఆ సినిమా, తమిళ .. తెలుగు భాషల్లో హిట్ టాక్ తెచ్చుకుంది. ఆ సినిమాకి కూడా తమన్ పనిచేశాడు. ఇప్పుడు అదే కాంబినేషన్లో 'శబ్దం' రానుందన్నమాట.