సమంత ఒప్పుకోవడంతోనే సక్సెస్ మొదలైంది: 'యశోద' నిర్మాత శివలెంక కృష్ణప్రసాద్

సమంత ప్రధాన పాత్రధారిగా శివలెంక కృష్ణ ప్రసాద్ 'యశోద' సినిమాను నిర్మించారు. హరి - హరీశ్ లకు దర్శకులుగా తెలుగులో ఇదే మొదటి సినిమా. మణిశర్మ సంగీతాన్ని సమకూర్చిన ఈ సినిమా, తెలుగుతో పాటుగా మలయాళ .. కన్నడ .. హిందీ భాషల్లో ఈ నెల 11వ తేదీన థియేటర్లకు వచ్చింది. విడుదలైన ప్రతి ప్రాంతంలో ఈ సినిమా సక్సెస్ టాక్ తో దూసుకుపోతోంది. 

ఈ నేపథ్యంలో ఈ సినిమా నిర్మాత శివలెంక కృష్ణప్రసాద్ మాట్లాడుతూ .. "హరి - హరీశ్ ఇద్దరూ కూడా ముందుగా ఈ సినిమాను తక్కువ బడ్జెట్ లో తమిళంలో చేయాలనుకున్నారుగానీ కుదరలేదు. దాంతో వారు నన్ను కలిశారు. ఈ కథకి సమంత అయితే కరెక్టుగా సరిపోతుందని భావించాను. ఆమె అయితే ప్రాజెక్టు నెక్స్ట్ లెవెల్ కి వెళుతుందంటూ వాళ్లిద్దరూ ఆనందాన్ని వ్యక్తం చేశారు. 

ఆ తరువాత మేము సమంతను సంప్రదించడం జరిగింది. ఆమె ఓకే చెప్పడంతోనే మేము సగం సక్సెస్ ను పొందినట్టుగా అనిపించింది. ఈ సినిమా విషయంలో సస్పెన్స్ ఏమిటనేది మీడియా మిత్రులు కూడా దాచిపెడుతూ వచ్చి హెల్ప్ చేశారు. ఈ సినిమా కోసం నానక్ రామ్ గూడాలోని రామానాయుడు స్టూడియోస్ లో రెండు సెట్లు వేసి తీశాము. క్లైమాక్స్ ను కొడైకెనాల్ లో చేశాము. ఏదేమైనా ఒక మంచి సినిమాను అందించినందుకు మాకు చాలా సంతోషంగా ఉంది" అంటూ చెప్పుకొచ్చారు.