'కాంతార' వసూళ్లకి కళ్లెం లేనట్టే!

ఈ మధ్య కాలంలో కన్నడ కథలు కూడా పాన్ ఇండియా స్థాయిలో తమ విశ్వరూపం చూపిస్తున్నాయి. 'కేజీఎఫ్ 2' తరువాత ఆ స్థాయిలో అందరూ మాట్లాడుకునేలా చేసిన సినిమా 'కాంతార'. రిషబ్ శెట్టి తానే హీరోగా నటిస్తూ, రచన - దర్శకత్వం చేపట్టిన సినిమా ఇది. అడవి నేపథ్యంలో గిరిజనుల ఆచారమే ప్రధానమైన కథాంశంగా తెరకెక్కిన ఈ సినిమా, టైటిల్ తోనే అందరిలో ఆసక్తిని రేకెత్తించింది.    

30 కోట్లతో నిర్మితమైన ఈ సినిమా క్రితం నెల 30వ తేదీన కన్నడలో విడుదలై 100 కోట్ల క్లబ్ లోకి చేరిపోయింది. అక్కడ ఈ సినిమాకి వస్తున్న రెస్పాన్స్ ను చూసిన తరువాత, గీతా ఆర్ట్స్ వారు ఈ నెల 15వ తేదీన ఇక్కడ విడుదల చేశారు. ఈ సినిమాలో హీరో హీరోయిన్లతో సహా ఎవరూ తెలుగు ఆడియన్స్ కి పెద్దగా తెలియదు. అయినా కంటెంట్ తో ఈ సినిమా కాసుల వర్షాన్ని కురిపిస్తోంది. 

తెలుగు రాష్ట్రాల్లో మొదటి 3 రోజుల్లోనే ఈ సినిమా 16 కోట్లకి పైగా వసూళ్లను రాబట్టింది. ఇంకా అదే జోరును కొనసాగిస్తూ వెళుతోంది. డిఫరెంట్ జోనర్ తో కూడిన సినిమా కావడం వలన .. దగ్గరలో ఆ స్థాయి సినిమాల పోటీ లేకపోవడం వలన దీపావళికి ఈ సినిమా వసూళ్లు మరింతగా పెరిగే అవకాశాలు ఉన్నాయనే అభిప్రాయాలు వ్యక్తమవుతున్నాయి.