దగ్గరుండి భర్తకు ప్రియురాలితో పెళ్లి జరిపించిన భార్య

సాధారణంగా తన భర్త మరొక మహిళతో సన్నిహితంగా ఉంటేనే ఏ భార్య కూడా భరించలేదు. చిన్న అనుమానం వచ్చినా పెద్ద యుద్ధమే జరుగుతుంది. కానీ, భర్తకు ఆయన ప్రియురాలితో భార్య పెళ్లి జరిపించిన ఘటన తిరుపతిలో జరిగింది. ఈ అంశం ఇప్పుడు చర్చనీయాంశంగా మారింది. 

వివరాల్లోకి వెళ్తే... తిరుపతిలోని అంబేద్కర్ నగర్ లో ఉంటున్న ఒక యువకుడు టిక్ టాక్ లో రాణిస్తున్న సమయంలో విశాఖకు చెందిన యువతితో పరిచయం ఏర్పడింది. ఆ తర్వాత అది ప్రేమకు దారితీసింది. ఇద్దరూ చనువుగా ఉన్నప్పటికీ కొన్నాళ్ల తర్వాత విడిపోయారు. ఆ తర్వాత టిక్ టాక్ లోనే కడపకు చెందిన మరో అమ్మాయితో అతనికి పరిచయం ఏర్పడింది. ఈ పరిచయం కూడా ప్రేమగా మారింది. అనంతరం ఇద్దరూ పెద్దలను ఒప్పించి పెళ్లి చేసుకున్నారు. 
ఆ తర్వాత విశాఖకు చెందిన అమ్మాయి మళ్లీ తిరిగొచ్చింది. ప్రియుడికి పెళ్లి జరిగిన విషయం తెలుసుకుని ఆమె బాధపడింది. ఆ బాధ నుంచి కోలుకున్న తర్వాత తాను కూడా ఇక్కడే ఉండిపోతానని, ముగ్గురం కలిసి ఉందామని ప్రియుడి భార్యతో చెప్పింది. ఈ మాట విన్న భార్య ముందు షాక్ తిన్నా.. తర్వాత ముగ్గురూ కలిసి ఉండేందుకు ఒప్పుకుంది. నిన్న దగ్గరుండి తానే తన భర్తకు, ఆయన ప్రియురాలికి పెళ్లి జరిపించింది. పెళ్లి కూతురుని కూడా ఆమె స్వయంగా అలంకరించింది. ఈ విషయం తిరుపతిలో హాట్ టాపిక్ గా మారింది.