ఏపీ హైకోర్టులో సినీ న‌టుడు మోహ‌న్ బాబు ఫ్యామిలీకి ఊర‌ట‌

ప్ర‌ముఖ సినీ న‌టుడు మంచు మోహ‌న్ బాబుకు సోమ‌వారం ఏపీ హైకోర్టులో ఊర‌ట ల‌భించింది. మంచు మోహ‌న్ బాబు, ఆయ‌న ఇద్ద‌రు కుమారులు మంచు విష్ణు, మంచు మ‌నోజ్‌ల‌పై తిరుప‌తి కోర్టులో ఓ కేసు విచార‌ణ సాగుతున్న సంగ‌తి తెలిసిందే. 2019 ఎన్నిక‌ల్లో రాష్ట్రంలో ఎన్నిక‌ల కోడ్ అమ‌ల్లో ఉండ‌గా... ఎన్నిక‌ల కోడ్‌ను ఉల్లంఘిస్తూ మోహ‌న్ బాబు త‌న ఇద్ద‌రు కుమారుల‌తో క‌లిసి ధ‌ర్నాకు దిగారు.

ఈ వ్య‌వ‌హారంపై మోహ‌న్ బాబు, ఆయ‌న ఇద్ద‌రు కుమారుల‌పై తిరుప‌తి పోలీసులు కేసు న‌మోదు చేయ‌గా... ఈ కేసు విచార‌ణ తిరుప‌తి కోర్టులో సాగుతోంది. ఈ విచార‌ణ‌ను నిలుపుద‌ల చేయాలంటూ మోహ‌న్ బాబు ఇటీవ‌లే హైకోర్టులో పిటిష‌న్ దాఖ‌లు చేశారు. ఈ పిటిష‌న్‌పై సోమ‌వారం విచార‌ణ చేప‌ట్టిన హైకోర్టు... తిరుప‌తి కోర్టులో కేసు విచార‌ణ‌ను 8 వారాల పాటు నిలుపుద‌ల చేసింది.