కామన్వెల్త్ క్రీడల్లో భారత బ్యాడ్మింటన్​ జట్టు చేజారిన స్వర్ణం

ప్రతిష్ఠాత్మక కామన్వెల్త్ క్రీడల్లో భారత్ మరో పతకం గెలిచింది. మిక్స్ డ్ బ్యాడ్మింటన్ జట్టు రజత పతకం గెలిచింది. దాంతో, ఈ క్రీడల్లో భారత్ సాధించిన పతకాల సంఖ్య 13కి చేరుకుంది. భారత బ్యాడ్మింటన్‌ మిక్స్ డ్ టీమ్‌ గత కామన్వెల్త్ క్రీడల్లో గెలిచి స్వర్ణ పతకాన్ని నిలబెట్టుకోలేకపోయింది. మంగళవారం అర్ధరాత్రి జరిగిన ఫైనల్లో 1-3 తేడాతో మలేసియా చేతిలో పరాజయం పాలైంది. పీవీ సింధు మినహా మిగతావారు ఓటమి పాలవ్వడంతో భారత్‌ రజతంతో సరిపెట్టుకోవాల్సి వచ్చింది. 

ఈ మ్యాచ్ లో మొదటిదైన పురుషుల డబుల్స్ లో సాత్విక్‌ సాయిరాజ్‌, చిరాగ్ షెట్టి జంట ఓడింది. మలేసియాకు చెందిన టెంగ్ ఫాంగ్ ఆరోన్ చియా, వూయి యిక్‌ ద్వయం 21-18, 21-15 తేడాతో చిరాగ్‌-సాత్విక్‌ జంటను ఓడించింది. అనంతరం మహిళల సింగిల్స్‌లో పీవీ సింధు 22-20, 21-17తో మలేసియా స్టార్‌ జిన్‌ వెయ్‌-గోహ్‌పై గెలిచి స్కోరు సమం చేసింది. కానీ, మూడోదైన పురుషుల సింగిల్స్ లో తెలుగు క్రీడాకారుడు కిడాంబి శ్రీకాంత్‌ నిరాశ పరిచాడు. జె యోంగ్‌  21-19,6-21,21-16తో శ్రీకాంత్ ను ఓడించడంతో మలేసియా 2-1తో ఆధిక్యంలోకి వెళ్లింది. 

ఇక, మ్యాచ్ లో నిలవాలంటే తప్పక నెగ్గాల్సిన మహిళల డబుల్స్‌లో భారత యువ జోడీ త్రీసా జోలీ- -గాయత్రి గోపిచంద్‌ కూడా తేలిపోయింది. మలేసియా జంట మురళీధరన్ తీనా- కూంగ్ లే పెర్లీ టాన్  21-18,21-17తో భారత్‌ జంటను ఓడించింది. రాంతో, మలేసియా స్వర్ణం గెలుచుకోగా... భారత్ రజతంతో సంతృప్తి చెందాల్సి వచ్చింది. ఈ కామన్వెల్త్ గేమ్స్ లో ప్రస్తుతం భారత్‌ ఖాతాలో 13 పతకాలు ఉన్నాయి. అందులో ఐదు స్వర్ణాలు, ఐదు రజతాలు, మూడు కాంస్యాలు ఉన్నాయి.