ముంద‌స్తు ఎన్నిక‌లు లేవు.. హ్యాట్రిక్ విక్ట‌రీ మాదే: కేటీఆర్‌

తెలంగాణ‌లో అసెంబ్లీ ఎన్నిక‌లు.. ఏ పార్టీని విజ‌యం వ‌రించ‌నుంద‌న్న విష‌యాల‌పై టీఆర్ఎస్ వ‌ర్కింగ్ ప్రెసిడెంట్‌, మంత్రి కేటీఆర్ శుక్ర‌వారం కీల‌క వ్యాఖ్య‌లు చేశారు. హైద‌రాబాద్‌లో మీడియా ప్ర‌తినిధుల‌తో శుక్ర‌వారం చిట్‌చాట్ నిర్వ‌హించిన సంద‌ర్భంగా తెలంగాణ‌లో ముంద‌స్తు ఎన్నిక‌లు లేవ‌ని ఆయ‌న‌ ప్ర‌క‌టించారు. షెడ్యూల్ ప్ర‌కార‌మే 2023లోనే ఎన్నిక‌లు జ‌ర‌గ‌నున్నాయ‌న్న కేటీఆర్... ఎన్నిక‌ల్లో టీఆర్ఎస్ హ్యాట్రిక్ విజ‌యం సాధించ‌డం ఖాయ‌మ‌ని ధీమా వ్యక్తం చేశారు.  

సీఎంగా కేసీఆర్ హ్యాట్రిక్ కొట్ట‌డం ఖాయ‌మ‌ని చెప్పిన కేటీఆర్‌... ఎన్నిక‌ల్లో 90కి పైగా స్థానాల‌ను టీఆర్ఎస్ గెలుస్తుంద‌ని చెప్పారు. రాష్ట్ర‌వ్యాప్తంగా టీఆర్ఎస్ హవా ఉంద‌న్న ఆయ‌న ఈ విష‌యాన్ని బీజేపీ, కాంగ్రెస్ స‌ర్వేలే చెబుతున్నాయ‌న్నారు. సీఎం కేసీఆర్‌ను దొర అంటూ విప‌క్షాలు ఆరోపిస్తున్నాయ‌ని ఆగ్ర‌హం వ్య‌క్తం చేసిన కేటీఆర్‌... దొర అయితే కేసీఆర్ ఎంత‌మందిని జైల్లో పెట్టార‌ని ప్ర‌శ్నించారు. 

పార్టీలో కొన్ని చోట్ల గొడ‌వ‌లు ఉన్నాయ‌న్న మాట వాస్త‌వ‌మేన‌ని అంగీక‌రించిన కేటీఆర్‌... అది టీఆర్ఎస్ బ‌లంగా ఉంద‌న‌డానికి నిద‌ర్శ‌న‌మ‌ని చెప్పారు. కేబినెట్‌లో త‌న‌కంటే మెరుగ్గా ప‌నిచేసే మంత్రులు చాలా మంది ఉన్నార‌ని కూడా కేటీఆర్ వ్యాఖ్యానించారు.