మోదీ సుప్రీం యాక్ట‌ర్ అంటూ ప్ర‌కాశ్ రాజ్ సెటైర్‌!

బీజేపీపైనా, ప్ర‌త్యేకించి ప్ర‌ధాన మంత్రి న‌రేంద్ర మోదీపైనా అవ‌కాశం చిక్కిన ప్ర‌తిసారీ సెటైర్లు సంధిస్తూ వ‌స్తున్న బ‌హుభాషా న‌టుడు ప్ర‌కాశ్ రాజ్ తాజాగా మంగ‌ళ‌వారం సాయంత్రం ఓ సెటైరిక‌ల్ ట్వీట్ సంధించారు. ప్ర‌ధాని న‌రేంద్ర మోదీని సుప్రీం యాక్ట‌ర్, డైరెక్ట‌ర్‌గా అభివ‌ర్ణిస్తూ ఆయ‌న స‌ద‌రు ట్వీట్‌ను పోస్ట్ చేశారు. కెమెరాల ముందుకు వ‌చ్చిన‌ప్పుడు మ‌న సుప్రీం యాక్ట‌ర్‌, డైరెక్ట‌ర్‌ను ఎవ‌రైనా బీట్ చేయ‌గ‌ల‌రా? అంటూ ప్ర‌కాశ్ రాజ్ ఆ ట్వీట్‌లో పేర్కొన్నారు. త‌న ట్వీట్‌కు తానే మొద‌లుపెట్టిన‌ జ‌స్ట్ ఆస్కింగ్ అనే ట్యాగ్‌ను కూడా ఆయ‌న జ‌త చేశారు.

ప్ర‌కాశ్ రాజ్ త‌న ట్వీట్‌కు మోదీకి చెందిన ఓ వీడియో క్లిప్పింగ్‌ను కూడా జ‌త చేశారు. టీవీ9కు చెందిన‌ 22 సెక‌న్ల నిడివి ఉన్న ఆ వీడియోలో ఏదో కార్య‌క్ర‌మానికి హాజ‌ర‌య్యేందుకు వ‌స్తున్న మోదీని త‌మ కెమెరాల్లో బంధించేందుకు అప్ప‌టికే కెమెరామెన్లు ఏర్పాటు చేసుకుని సిద్ధంగా ఉండ‌గా... ఆ కెమెరాల ముందుకు ఓ వ్య‌క్తి వ‌చ్చి మోదీకి అభివాదం చేసేందుకు య‌త్నించారు. అయితే ఆ వ్య‌క్తిని వెన‌క్కు వెళ్లాల‌ని సూచించిన మోదీ... కెమెరాల‌కు అత‌డు దూరంగా జ‌రిగిన త‌ర్వాత ఆ వ్య‌క్తికి అభివాదం చేస్తూ మోదీ సాగారు.