'విరాట పర్వం' మేకప్ లేకుండా చేశాను: సాయిపల్లవి

సాయిపల్లవి తాజా చిత్రంగా 'విరాటపర్వం' రూపొందింది. ఈ నెల 17వ తేదీన ఈ సినిమా విడుదలవుతోంది. ఈ సినిమా ప్రమోషన్స్ లో సాయిపల్లవి మాట్లాడుతూ .. "ఈ సినిమాలో నేను 'వెన్నెల' పాత్రలో కనిపిస్తాను. ఒక గ్రామీణ నేపథ్యంలో పెరిగిన అమ్మాయి ఎలా ఉంటుందో .. అలాగే ఈ సినిమాలో కనిపిస్తాను.

సాధారణంగా నేను మేకప్ తక్కువగానే వేసుకుంటాను .. ఐ లైనర్ మాత్రం తప్పకుండా వేసుకుంటాను. కానీ ఈ సినిమాలో మాత్రం మేకప్ లేకుండానే చేశాను. షాట్ రెడీ అనగానే ముఖం కడుక్కుని కెమెరా ముందుకు వెళ్లిపోయేదానిని. ఆ పాత్ర సహజత్వం కోసం అలా చేయవలసి వచ్చింది. దర్శకుడు వేణు ఇలా ఎన్నో జాగ్రత్తలు తీసుకున్నారు.

ఇక నాకు ఇచ్చిన పాత్రను సాధ్యమైనంత సహజంగా చేయడానికి ట్రై చేస్తుంటాను. ఒక పాత్రను ఏ స్థాయి వరకూ తీసుకుని వెళ్లొచ్చు అనే విషయంలో నాకు ఒక అవగాహన ఉంది. ఇక ఒక కథను ఎక్కడి వరకూ తీసుకుని వెళ్లొచ్చు అనేది రానాగారికి బాగా తెలుసు. ఆయన నుంచి నేను నేర్చుకున్నది అదే" అంటూ చెప్పుకొచ్చింది.