మ‌ద్యం అమ్మ‌కాలు అడ్డుకున్న వ్య‌క్తిపై గ్రామ బ‌హిష్క‌ర‌ణ వేటు

ఏపీలో సోమ‌వారం ఓ అరుదైన ఘ‌ట‌న చోటుచేసుకుంది. గ్రామంలో మ‌ద్యం విక్ర‌యాలు అడ్డుకున్న ఓ వ్య‌క్తిని ఆ గ్రామ పెద్ద‌లు ఏకంగా గ్రామం నుంచి బ‌హిష్క‌రించారు. శ్రీ బాలాజీ జిల్లా ప‌రిధిలోని ఏర్పేడు మండ‌లం కొత్త వీరాపురంలో ఈ ఘ‌ట‌న చోటుచేసుకుంది. 

గ్రామంలో మ‌ద్యం విక్ర‌యించ‌రాదని చెప్పిన మునికృష్ణారెడ్డి అనే వ్య‌క్తి.. గ్రామంలో మ‌ద్యం విక్ర‌యాల‌ను అడ్డుకున్నార‌ట‌. దీంతో ఈ వ్య‌వ‌హారంపై దృష్టి సారించిన గ్రామ పెద్ద‌లు మ‌ద్యం విక్ర‌యాల‌ను అడ్డుకున్నందుకు మునికృష్ణారెడ్డిపై గ్రామ బ‌హిష్క‌ర‌ణ వేటు వేయాల‌ని నిర్ణ‌యించారు. ఆ మేర‌కు సోమ‌వారం గ్రామంలో దండోరా కూడా వేయించారు. ఈ ఘ‌ట‌న‌పై అటు పోలీసుల‌కు గానీ, ఇటు ప్ర‌భుత్వాధికారుల‌కు గానీ మునికృష్ణారెడ్డి ఇప్ప‌టిదాకా ఫిర్యాదు చేయ‌లేదు.