తండ్రి అఘాయిత్యాన్ని వీడియోతో బయటపెట్టిన యువతి

బంధాలనే ప్రశ్నార్థకం చేశాడు. పది మందికి విద్యా బుద్ధులు నేర్పాల్సిన వృత్తిలో ఉండి కూడా, సమాజం చీదరించుకునే పని చేశాడు. బీహార్ రాష్ట్రంలోని సమస్థిపూర్ జిల్లా రొసెరా గ్రామంలో 50 ఏళ్ల ఉపాధ్యాయుడు కన్న కుమార్తెపైనే అత్యాచారానికి పాల్పడ్డాడు. ఒక్కసారి కాదు.. ఎన్నో పర్యాయాలు. బెదిరించి అతడు చేస్తున్న దారుణాన్ని ఆమె తట్టుకోలేకపోయింది. 

వేరే మార్గం లేక తనపై తండ్రి చేస్తున్న దారుణాన్ని రహస్య కెమెరాలో బంధించి సామాజిక మాధ్యమం వేదికగా పది మందితో పంచుకుంది బాధితురాలు. తనకు న్యాయం చేయాలని కోరింది. దీంతో పోలీసులు ఆమెను సంప్రదించారు. బాలిక ఫిర్యాదు మేరకు కేసు నమోదు చేసి, నిందితుడిని అరెస్ట్ చేసినట్టు రొసెరా డీఎస్పీ సహియార్ అక్తర్ తెలిపారు. 

నిందితుడిని పోలీసులు విచారిస్తున్నారు. ఈ కేసులో ఇతర నిందితులు ఎవరైనా ఉన్నారా? అన్న సమాచారాన్ని రాబట్టే పనిలో ఉన్నట్టు డీఎస్పీ తెలిపారు. బాలిక తల్లి సైతం ఈ దారుణాలను చూస్తున్నా, తనపై వచ్చిన ఒత్తిడి వల్ల మిన్నకుండిపోయింది.