మాకు సమన్లు వచ్చిన విషయం నిజమే.. కానీ, నేను అరెస్ట్‌ కాలేదు: జీవితా రాజ‌శేఖ‌ర్

సినీ న‌టులు జీవిత, రాజశేఖర్ దంపతులు ఓ సినిమా కోసం రూ.26 కోట్ల అప్పు తీసుకుని ఎగవేతకు పాల్పడినట్టు జోష్టర్ ఫిలిం సర్వీసెస్ యాజమాన్యం ఆరోపణలు చేయడం తెలిసిందే. దీనిపై ఈ రోజు జీవిత‌ మీడియా స‌మావేశంలో మాట్లాడుతూ... తనకు సమన్లు వచ్చిన విషయం నిజమేన‌ని.. కానీ, తాను అరెస్ట్‌ కాలేదని చెప్పారు. ఏడాదికి పైగా నగరి కోర్టులో ఈ కేసు నడుస్తోందని తెలిపారు. ఇంత కాలంగా ఈ కేసులు న‌డుస్తుంటే వారు మీడియా ముందుకు ఇప్పుడు ఎందుకు వచ్చారో అర్థం కావ‌ట్లేద‌ని చెప్పారు. 

ఇంతకు ముందు కూడా త‌న‌కు మ‌రో కేసులో వారెంట్‌ వచ్చిందని, అయితే ఆ కేసులో తానే గెలిచినట్లు తెలిపారు. తాము రూ.26 కోట్ల మోసానికి పాల్ప‌డ్డామ‌ని త‌మ‌పై జోష్టర్ ఫిలిం సర్వీసెస్ అధినేత కోటేశ్వర్‌రావు అంటున్నారని, అయితే, అవి ఏ కోట్లో అర్థం కావడం లేదని ఆమె ఎద్దేవా చేశారు. త‌మ‌పై తప్పుడు ప్ర‌చారం చేస్తున్నార‌ని మండిప‌డ్డారు. కోటేశ్వర‌రావు వల్ల తమ మేనేజర్లు ఇబ్బంది పడ్డారని ఆమె తెలిపారు.