గోవా సీఎంగా ప్ర‌మోద్ సావంత్‌.. ప్ర‌క‌టించిన బీజేపీ

గోవా ముఖ్య‌మంత్రిగా ప్ర‌మోద్ సావంత్‌ను కొన‌సాగించేందుకే బీజేపీ నిర్ణ‌యించింది. ఈ మేరకు కాసేప‌టి క్రితం సావంత్‌ను గోవా బీజేపీ శాస‌న‌స‌భాప‌క్ష నేత‌గా ఎంపిక చేసిన‌ట్లు ఆ పార్టీ జాతీయ నాయ‌క‌త్వం ప్ర‌క‌టించింది. ఫ‌లితంగా గోవా సీఎంగా వ‌రుస‌గా రెండోసారి ప్ర‌మోద్ సావంత్ త్వ‌ర‌లో ప‌ద‌వీ బాధ్య‌త‌లు చేప‌ట్ట‌నున్నారు.

ఇటీవ‌ల ముగిసిన ఐదు రాష్ట్రాల్లో బీజేపీ విజ‌యం సాధించిన నాలుగు రాష్ట్రాల సీఎం అభ్య‌ర్థుల‌ను ఆ పార్టీ ప్ర‌క‌టించిన‌ట్టయింది. నాలుగు రాష్ట్రాల్లో కూడా అంత‌కుముందు సీఎంలుగా వ్య‌వహ‌రించిన నేత‌ల‌కే మ‌ళ్లీ ఆ ప‌ద‌వుల‌ను అప్ప‌గించింది. ఇప్ప‌టికే యూపీ సీఎంగా యోగి ఆదిత్య‌నాథ్ ను ప్ర‌క‌టించిన బీజేపీ.. తాజాగా మ‌ణిపూర్ సీఎంగా బీరేన్ సింగ్‌, ఉత్త‌రాఖండ్ సీఎంగా పుష్క‌ర్ సింగ్ ధామి, గోవా సీఎంగా ప్ర‌మోద్ సావంత్‌ల‌ను ఆయా రాష్ట్రాల‌కు సీఎంలుగా ప్ర‌క‌టించింది.