90 ఏళ్లలో 12 మంది భారత క్రికెటర్లకే సాధ్యమైన టెస్ట్ రికార్డు

ఏ క్రికెటర్ కు అయినా తన కెరీర్ లో 100 టెస్ట్ మ్యాచ్ ల మైలురాయిని చేరుకోవడం నిజంగా విశేషమైనది. విరాట్ కోహ్లీ శుక్రవారంతో ఈ అరుదైన రికార్డును నమోదు చేశాడు. 100 టెస్ట్ మ్యాచ్ ల క్లబ్ లోకి చేరిపోయాడు. ఎంతో నిలకడగా రాణిస్తే తప్ప ఒక క్రికెటర్ కు ఎక్కువ అవకాశాలు రావు. అందుకే ప్రతిభావంతులకే ఈ రికార్డు పరిమితమవుతోంది. 
ఇచ్చిన అవకాశాలను సద్వినియోగం చేసుకున్నప్పుడే జట్టు ఆ ఆటగాడిపై నమ్మకంతో మరిన్ని అవకాశాలను కల్పిస్తుంటుంది. దాంతో 100 టెస్ట్ ల మైలురాయిని చేరుకునేందుకు మార్గం ఏర్పడుతుంది. పైగా ఏటా జరిగే టెస్ట్ మ్యాచ్ లు తగ్గిపోతున్నాయి. ఈ క్రమంలో ఈ అరుదైన రికార్డును సాధించడం క్రికెటర్లకు నిజంగా అసాధారణమైనదే.
144 ఏళ్ల టెస్ట్ క్రికెట్లో ఇప్పటికి 100 టెస్ట్ మ్యాచుల మైలురాయిని సాధించిన క్రికెటర్లు అంతర్జాతీయంగా చూస్తే 71 మందే ఉన్నారు. అందులో భారత్ నుంచి 12 మందికే ఇది సాధ్యపడింది. 200 టెస్ట్ మ్యాచ్ లు ఆడిన రికార్డు మాత్రం ఒక్క సచిన్ పేరిటే ఉండడం గమనించాలి. భారత్ అంతర్జాతీయ టెస్ట్ మ్యాచ్ లను 1932లో ప్రారంభించింది. ఇంగ్లండ్ లోని లార్డ్స్ మైదానంలో 1932 జూన్ 25-28 తేదీల మధ్య మొదటి టెస్ట్ మ్యాచ్ ఆడి ఓటమి చవిచూసింది.
 
సెంచురీ టెస్ట్ మ్యాచ్ లు ఆడిన వారు

క్రికెటర్	ఆడిన మ్యాచ్ లు	చేసిన పరుగులు	తీసిన వికెట్లు
సచిన్	200	15921	46
రాహుల్ ద్రవిడ్	163	13265	1
వీవీఎస్ లక్ష్మణ్	134	8781	2
అనిల్ కుంబ్లే	132	2506	619
కపిల్ దేవ్	131	5248	434
సునీల్ గవాస్కర్	125	10122	1
దిలీప్ వెంగ్ సర్కార్	116	6868	0
సౌరవ్ గంగూలీ	113	7212	32
ఇషాంత్ శర్మ	104	785	311
హర్బజన్ సింగ్	103	2224	417
వీరేంద్ర సెహ్వాగ్	103	8503	40
విరాట్ కోహ్లీ	100	-	-