తిరుగులేని ఫామ్ లో ఉన్న టీమిండియా అండర్-19 కెప్టెన్... రెండో ఇన్నింగ్స్ లోనూ సెంచరీ

ఇటీవల అండర్-19 వరల్డ్ కప్ సాధించిన భారత కుర్రాళ్ల జట్టు సారథి యశ్ ధూల్ అద్భుతమైన ఫామ్ లో ఉన్నాడు. కెరీర్ లో తొలి రంజీ మ్యాచ్ లోనే సెంచరీ చేసి అందరి దృష్టిని ఆకర్షించిన ఈ 19 ఏళ్ల కుర్రాడు... రెండో ఇన్నింగ్స్ లోనూ శతకం సాధించి ఔరా అనిపించాడు.

కెరీర్ తొలి రంజీ మ్యాచ్ లో ఇలా రెండు సెంచరీలు చేసిన ఆటగాళ్లలో యశ్ ధూల్ మూడోవాడు. గతంలో నారిమన్ కాంట్రాక్టర్ (1952-53), విరాట్ అవథే (2012-13) తమ తొలి రంజీ మ్యాచ్ లో రెండు ఇన్నింగ్స్ ల్లోనూ శతకాల మోత మోగించారు.

కాగా, గువాహటిలో జరుగుతున్న రంజీ ట్రోఫీ లీగ్ మ్యాచ్ లో యశ్ ధూల్ ఢిల్లీ జట్టుకు ప్రాతినిధ్యం వహించాడు. తమిళనాడు జట్టుతో జరిగిన ఈ మ్యాచ్ లో తొలి ఇన్నింగ్స్ లో 113 పరుగులు చేసిన ధూల్, రెండో ఇన్నింగ్స్ లోనూ సరిగ్గా 113 పరుగులు చేసి అజేయంగా నిలిచాడు. ఈ మ్యాచ్ డ్రాగా ముగిసింది.