ఇండియా ఓపెన్ బ్యాడ్మింట‌న్ టోర్నీలో క‌రోనా క‌ల‌క‌లం.. ఏడుగురు భార‌త షట్ల‌ర్ల‌కు కొవిడ్‌

ఇండియా ఓపెన్ బ్యాడ్మింట‌న్ టోర్నీలో క‌రోనా క‌ల‌క‌లం రేపుతోంది. ఏడుగురు భార‌త షట్ల‌ర్ల‌కు కొవిడ్ సోకింది. ఈ టోర్నీ మొన్న‌ ప్రారంభమైంది. ఈ టోర్నీలో నేడు రెండో దశ మ్యాచ్‌లు జరగాల్సి ఉండ‌గా, ఆట‌గాళ్ల‌కు క‌రోనా ప‌రీక్ష‌లు చేశారు. దీంతో స్టార్ ష‌ట్ల‌ర్ కిదాంబి శ్రీకాంత్‌ సహా ఏడుగురికి పాజిటివ్ గా తేలిన‌ట్లు ప్రపంచ బ్యాడ్మింటన్‌ ఫెడరేషన్‌ (బీడబ్ల్యూఎఫ్‌) ఓ ప్రకటనలో తెలిపింది.

క‌రోనా సోకిన కిదాంబి శ్రీ‌కాంత్‌తో పాటు అశ్విని పొన్నప్ప, రితికా రాహుల్‌ థక్కర్, ట్రెస్సా జోలీ, మిథున్‌ మంజునాథ్‌, సిమ్రన్‌ అమాన్‌ సింఘీ, కుషి గుప్తాను ప్రత్యేక ఐసోలేషన్‌ కేంద్రానికి త‌ర‌లించిన‌ట్లు ప్ర‌క‌టించింది. ఈ ఏడుగురు షట్ల‌ర్ల‌ డబుల్స్‌ పార్ట్‌నర్ల‌ను కూడా టోర్నీ నుంచి నిష్క్ర‌మింప‌జేసిన‌ట్లు తెలిపింది.

ఆ ఏడుగురు ష‌ట్ల‌ర్ల‌తో త‌ల‌ప‌డాల్సిన ష‌ట్ల‌ర్లను నేరుగా తదుపరి రౌండ్లకు ప్రమోట్‌ చేస్తున్న‌ట్లు బీడబ్ల్యూఎఫ్ ప్ర‌క‌టించింది. బ్యాడ్మింటన్‌ అసోసియేషన్‌ ఆఫ్‌ ఇండియా (బీఏఐ) కూడా ఈ విష‌యాన్ని ధ్రువీకరించింది. కాగా, ఇటీవ‌లే సాయి ప్రణీత్‌కు కూడా కరోనా సోక‌డంతో ఆయ‌న టోర్నీ నుంచి నిష్క్రమించాడు. అలాగే, ఈ టోర్నీలో ఆడాల్సిన‌ ఇంగ్లాండ్‌కు చెందిన ఇద్దరు క్రీడాకారులకు కూడా క‌రోనా సోకింది.

దీంతో ఇంగ్లాండ్‌ జట్టు ఈ టోర్నీ నుంచి ఇప్ప‌టికే తప్పుకుంది. భారీ క‌రోనా కేసులు న‌మోద‌వుతుండ‌డంతో ఈ టోర్నీ నిర్వహణపై సందేహాలు వ‌స్తున్నాయి. బ్యాడ్మింటన్‌ అసోసియేషన్‌ ఆఫ్‌ ఇండియా దీనిపై నిర్ణ‌యం తీసుకోవాల్సి ఉంది. క‌రోనా నియంత్ర‌ణ కోసం జాగ్ర‌త్త‌లు తీసుకున్న‌ప్ప‌టికీ ఏడుగురికి వైర‌స్ సోక‌డంతో ఈ టోర్నీని ర‌ద్దు చేస్తార‌న్న ఊహాగానాలు వ్య‌క్త‌మ‌వుతున్నాయి.