షూటింగ్ పూర్తి చేసుకున్న 'ఆదిపురుష్'.. రూ. 400 కోట్లతో తెరకెక్కిన చిత్రం!

టాలీవుడ్ నుంచి పాన్ ఇండియా స్టార్ గా ఎదిగిన ప్రభాస్ తాజా చిత్రం 'ఆదిపురుష్'. ప్రముఖ బాలీవుడ్ దర్శకుడు ఓం రౌత్ ఈ చిత్రాన్ని తెరకెక్కించారు. భారీ బడ్జెట్ తో 3డీ చిత్రంగా ఇది ప్రేక్షకుల ముందుకు రానుంది. ఈ చిత్రంలో ప్రభాస్ రాముడి పాత్రను పోషిస్తుండగా.... కృతిసనన్ సీత పాత్రలో నటిస్తున్నారు. లంకేశుడు రావణుడి పాత్రను సైఫ్ అలీ ఖాన్, లక్ష్మణుడి పాత్రను సన్నీ సింగ్ పోషించారు. దాదాపు రూ. 400 కోట్ల బడ్జెట్ తో ఈ సినిమాను నిర్మించారు.

భారీ తారాగణం, బడ్జెట్ తో తెరకెక్కిన 'ఆదిపురుష్' సినిమా షూటింగ్ ను పూర్తి చేసుకుంది. ఈ విషయాన్ని తెలియజేస్తూ ఓం రౌత్ సోషల్ మీడియాలో ఓ ఫొటోను పోస్ట్ చేశారు. 103 రోజుల్లో షూటింగ్ ను పూర్తి చేశామని ఆయన తెలిపారు. ఒక అద్భుతమైన ప్రయాణం గమ్యస్థానానికి చేరుకుందని చెప్పారు. తాము క్రియేట్ చేసిన మేజిక్ ను మీ అందరితో పంచుకునేందుకు ఆసక్తిగా ఎదురు చూస్తున్నామని అన్నారు.