గ్రామీణ ప్రాథమిక వైద్యంలో తెలంగాణకు జాతీయస్థాయిలో మొదటి స్థానం

ప్రాథమిక వైద్యం విషయంలో జాతీయ స్థాయిలో తెలంగాణకు మొదటి ర్యాంకు లభించింది. గ్రామీణ ప్రాథమిక ఆరోగ్య కేంద్రాల్లో అందిస్తున్న ఉత్తమ సేవలకు గాను ఈ స్థానం లభించింది. పట్టణ పీహెచ్‌సీల విభాగంలో రెండో స్ధానాన్ని దక్కించుకుంది. 2018-19 నుంచి 2020-21 సంవత్సరాలకు గాను ఈ పురస్కారాలు లభించాయి. కేంద్ర ఆరోగ్య, కుటుంబ సంక్షేమశాఖ మంత్రి మన్‌సుఖ్ మాండవీయ నిన్న ఈ వివరాలను వెల్లడించారు.

రోగికి సంతృప్తికర వైద్యసేవలు అందించే విషయంలో ఉత్తమ ప్రతిభ కనబరుస్తున్న ప్రాథమిక ఆరోగ్య కేంద్రాలకు ‘నాణ్యత ప్రమాణాల ధ్రువపత్రాలను’ కేంద్రం ప్రతి సంవత్సరం అందిస్తోంది. దీనిని ‘నేషనల్ క్వాలిటీ అస్యూరెన్స్ ప్రోగ్రామ్’ (NQAS ) అని పిలుస్తున్నారు. 2017 నుంచి ఈ కార్యక్రమాన్ని తెలంగాణలో అమలు చేస్తున్నారు.

రాష్ట్రంలోని 106 ఆసుపత్రులకు ఇప్పటికే ఈ ధ్రువీకరణ పత్రాలు లభించాయి. త్వరలో మరో 20 పీహెచ్‌సీలకు ఈ పత్రాలు లభించే అవకాశం ఉందని ఆరోగ్య, కుటుంబ సంక్షేమ కమిషనర్ వాకాటి కరుణ తెలిపారు. ఈ ధ్రువీకరణ పత్రాలు లభించిన కేంద్రాలకు మూడేళ్లపాటు ప్రతి సంవత్సరం కేంద్రం నుంచి రూ. 3 లక్షల నగదు పారితోషికం లభిస్తుంది.