వార్నర్ పై సన్ రైజర్స్ చేసిన ట్వీట్ కు స్పందించిన 'ఆర్ఆర్ఆర్' చిత్రబృందం

మరికొన్నిరోజుల్లో యూఏఈ గడ్డపై ఐపీఎల్ కోలాహలం ప్రారంభం కానుంది. భారత్ లో నిలిచిపోయిన ఐపీఎల్-14 సీజన్ ను యూఏఈ వేదికగా పూర్తిచేయనున్నారు. ఈ పోటీలు ఈ నెల 19 నుంచి షురూ అవుతాయి. అందుకు మరికొన్నిరోజుల సమయం మాత్రమే ఉండడంతో ఫ్రాంచైజీలన్నీ ఈపాటికే యూఏఈ చేరుకుని సన్నాహాలు ముమ్మరం చేశాయి. ఈ క్రమంలో సన్ రైజర్స్ హైదరాబాద్ ఆటగాళ్లు కూడా నెట్స్ లో చెమటోడ్చుతున్నారు.

డాషింగ్ ఆటగాడు డేవిడ్ వార్నర్ సాధన చేస్తుండగా, దీనిపై సన్ రైజర్స్ యాజమాన్యం ఓ ట్వీట్ చేసింది. వార్నర్ ఇదిగో ఇలా... అంటూ వార్నర్ (WARNERRR) అనే పదంలో మూడు ఆర్ లను పేర్కొంది. దీనిపై ఆర్ఆర్ఆర్ చిత్రబృందం స్పందించింది. తాము కూడా వార్నర్ అన్న మాస్ షో కోసం వేచిచూస్తున్నామని బదులిచ్చింది. ఈ సరదా సంభాషణకు నెటిజన్లు లైకుల వర్షం కురిపిస్తున్నారు.