అందరూ తుపాకులు కొనుక్కోవాలి: బ్రెజిల్ అధ్యక్షుడు బొల్సనారో

వివాదాస్పద వ్యాఖ్యలకు పెట్టింది పేరైన బ్రెజిల్ దేశాధ్యక్షుడు జైర్ బొల్సనారో.. మరోసారి వార్తల్లో నిలిచారు. తమ దేశంలోని ప్రజలందరూ తుపాకులు కొనుక్కునేలా చట్టాలు మార్చడానికి ఇదివరకు ఆయన ప్రయత్నించారు. దీంతో ఆయనపై విమర్శలు వెల్లువెత్తాయి. ఇప్పుడు మరోసారి ఈ విషయంలోనే బొల్సనారో వివాదాస్పద వ్యాఖ్యలు చేశారు. తుపాకులు కొనుగోలు చేసుకునే వారిని విసిగించడం మానుకోవాలని ఆయన తన విమర్శకులకు హితవు చెప్పారు.

బ్రెజిల్ అధ్యక్ష భవనం అల్వోరాడా ప్యాలెస్ బయట తన మద్దతుదారులతో బొల్సనారో సమావేశమయ్యారు. ఈ సందర్భంగానే తుపాకులు కొనుగోలు చేయడంపై మాట్లాడారు. వ్యక్తిగత రక్షణ కోసం బ్రెజిల్ ప్రజలందరూ తుపాకులు కొనుగోలు చేసేలా చట్టాల్లో మార్పులు చేయడానికి ఆయన గతంలో ప్రయత్నించారు. కానీ ఆ ప్రయత్నం ఫలించలేదు. ఈ నేపథ్యంలోనే శుక్రవారం మీటింగ్ సందర్భంగా మాట్లాడిన ఆయన.. ‘‘తుపాకులు కొనుగోలు చేసే వారిని విసిగించకండి. అందరూ రైఫిల్స్ కొనుక్కోవాల్సిన అవసరం ఉంది’’ అని అన్నారు.