రాజస్థాన్ లో కుప్పకూలిన మిగ్-21 బైసన్ యుద్ధ విమానం.. పైలెట్ సురక్షితం

భారత వాయుసేనకు చెందిన మిగ్-21 బైసన్ యుద్ధవిమానం ప్రమాదానికి గురైంది. రాజస్థాన్ లోని బర్మార్ వద్ద ఈ సాయంత్రం నింగికి ఎగసిన మిగ్ యుద్ధ విమానం కాసేపటికే కుప్పకూలింది. ఈ ఘటనలో పైలట్ సురక్షితంగా బయటపడ్డాడు. పైలెట్ కు స్వల్పగాయాలయ్యాయి.

 ఈ సాయంత్రం 5.30 గంటలకు శిక్షణలో భాగంగా విమానం గాల్లోకి లేవగా, టేకాఫ్ అనంతరం సాంకేతికలోపం తలెత్తినట్టు ప్రాథమికంగా వెల్లడైంది. ఈ విమానం ఓ గ్రామ శివారు ప్రాంతంలో కూలిపోవడంతో ఓ గుడిసెకు నిప్పంటుకుంది. ఈ విమాన ప్రమాదంపై భారత వాయుసేన శాఖాపరమైన విచారణకు ఆదేశించింది.