పూజ హెగ్డేపై రోజా భర్త ఆర్కే సెల్వమణి విమర్శలు

టాలీవుడ్, కోలీవుడ్ లో ఇప్పుడు ఫుల్ డిమాండ్ ఉన్న హీరోయిన్ పూజ హెగ్డే. బాలీవుడ్ లో కూడా ఆమె వరుస ఆఫర్లను చేజిక్కించుకుంటోంది. అగ్ర హీరోలందరూ ఆమెనే ప్రిఫర్ చేస్తుండటంతో ఈ కన్నడ భామ ఫుల్ బిజీ అయిపోయింది. భారీ రెమ్యునరేషన్ ను డిమాండ్ చేస్తున్నా... దర్శకనిర్మాతలు ఆమె కోసం క్యూ కడుతున్నారు. మరోవైపు పూజపై వైసీపీ ఎమ్మెల్యే రోజా భర్త, తమిళ సినీ దర్శకుడు ఆర్కే సెల్వమణి విమర్శలు గుప్పించారు.

స్టార్ డమ్ రాగానే పూజ ఎంతో మారిపోయిందని ఆయన అన్నారు. ఆమె వల్ల నిర్మాతకు ఆర్థిక భారం పెరుగుతోందని చెప్పారు. తొలి నాళ్లలో పూజ తన వెంట ఒక అసిస్టెంట్ ను తీసుకొచ్చేదని... షూటింగ్ సమయంలో డ్రెస్సింగ్, మేకప్, ఇతర అవసరాలను అతనే చూసుకునేవాడని సెల్వమణి తెలిపారు. ఇప్పుడు ఏకంగా 12 మంది అసిస్టెంట్లను వెంట పెట్టుకుని షూటింగులకు వస్తోందని... దీనివల్ల నిర్మాతలపై ఆర్థిక భారం పడుతోందని విమర్శించారు. ఇంతమంది అసిస్టెంట్ల అవసరం ఏముందో తనకు అర్థం కావడం లేదని అన్నారు.

ప్రస్తుతం పూజ చేతిలో నాలుగు ప్రాజెక్టులు ఉన్నాయి. ప్రభాస్ తో కలిసి నటించిన 'రాధేశ్యామ్' త్వరలో ప్రేక్షకుల ముందుకు రాబోతోంది. తమిళంలో విజయ్ సినిమా 'బీస్ట్'లో కథానాయికగా ఎంపికయింది. బాలీవుడ్ లో సల్మాన్ సరసన 'కబీ ఈద్ కబీ దివాలి', రణ్ వీర్ సరసన 'సర్కస్' సినిమాల్లో నటిస్తోంది.