దక్షిణాఫ్రికా మాజీ అధ్యక్షుడు జాకబ్ జుమాకు జైలుశిక్ష!

దక్షిణాఫ్రికా మాజీ అధ్యక్షుడు జాకబ్‌ జుమాకు ఆ దేశ సుప్రీంకోర్టు 15 నెలల జైలుశిక్షను విధించింది. ఆయన అధ్యక్షుడిగా పనిచేసిన సమయంలో అవినీతికి పాల్పడ్డారంటూ వచ్చిన ఆరోపణలపై జరుగుతున్న విచారణకు జుమా హాజరు కాకపోవడంతో న్యాయమూర్తి ఆగ్రహాన్ని వ్యక్తం చేస్తూ, ఈ శిక్షను విధించారు. ఆయన కోర్టును ధిక్కరించారని ఈ సందర్భంగా న్యాయమూర్తి వ్యాఖ్యానించారు.

జుమా ఏదైనా పోలీస్ స్టేషన్ లో ఐదు రోజుల్లోగా లొంగిపోవాలని లేకుంటే, అరెస్ట్ కు ఆదేశాలు జారీ చేస్తామని ఆయన అన్నారు. కాగా, ప్రస్తుతం 79 సంవత్సరాల వయసులో ఉన్న జుమా, 2009 నుంచి 2018 వరకూ అధ్యక్షుడిగా పనిచేశారు.