నేను వచ్చానంటే కరోనా ఖతం: నిత్యానంద

అత్యాచార ఆరోపణలపై దేశం విడిచి పారిపోయిన వివాదాస్పద స్వామీజీ నిత్యానంద మరోసారి తెరపైకి వచ్చారు. భారత్ లో కరోనా పరిస్థితులపై స్పందించారు. తాను భారత్ లో అడుగుపెడితే కరోనాకు అంతిమ సమయం ఆసన్నమైనట్టేనని వ్యాఖ్యానించారు.  

నిత్యానంద ఈక్వెడార్ దేశం సమీపంలో ఓ దీవిని కొనుగోలు చేసి దాన్ని కైలాస పేరిట ఓ దేశంగా ప్రకటించుకోవడం తెలిసిందే. సొంత కరెన్సీ, బ్యాంకులు, ప్రత్యేక పాస్ పోర్టులు ఇలా పలు అంశాలతో తన కైలాస ఓ దేశమేనని అందరినీ నమ్మించేందుకు ప్రయత్నిస్తున్నారు. తన దేశాన్ని గుర్తించాలని ఐక్యరాజ్యసమితిని కూడా కోరారు. అంతేకాదు, కరోనా వ్యాప్తి నేపథ్యంలో తన దేశానికి కొన్ని యూరప్ దేశాల నుంచి రాకపోకలను కూడా నిషేధించారు. ఈ మేరకు ఆయా దేశాల దౌత్య కార్యాలయాలకు లేఖలు కూడా రాశారు.

కాగా, భారత్ నుంచి పరారైన తర్వాత నిత్యానంద తరచుగా శిష్యులతో మాట్లాడుతున్నట్టు వెల్లడైంది. ఈ క్రమంలో ఓ శిష్యుడు కరోనాపై అడిగిన ప్రశ్నకు జవాబు ఇస్తూ పైవిధంగా వ్యాఖ్యానించారు. తాను భారత గడ్డపై ఎప్పుడు కాలు మోపితే అప్పుడే కరోనాకు ఆఖరి ఘడియలు అని పేర్కొన్నారు.