చైనాకు అతి చిన్న దేశం షాక్​!

అది అతి చిన్న దేశం లిథువేనియా. జనాభా తిప్పితిప్పికొడితే 28 లక్షలు కూడా లేదు. అలాంటి దేశం ఇప్పుడు చైనాపై తిరగబడింది. నువ్వెంత అనేంత స్థాయికి వచ్చింది. దానికి కారణమేంటి? అంటే.. చైనా సంగతి తెలియని వారెవరుంటారు! ఆ విషయం ఈ మధ్యే లిథువేనియాకు తెలిసొచ్చింది. స్నేహంగా మెలుగుతూనే గూఢచర్యం చేస్తోందని గుర్తించింది.

ఇప్పుడు కరోనా మహమ్మారి సమయంలోనూ గూఢచర్యం చేస్తోందని, దాని వల్ల తమ దేశ భద్రతకు ముప్పు పొంచి ఉందని లిథువేనియా ఆరోపిస్తోంది. ఈ క్రమంలోనే మధ్య, తూర్పు యూరప్ దేశాలతో చైనా ఏర్పాటు చేసిన 17+1 కూటమి నుంచి వైదొలిగింది. యూరప్ దేశాలన్నీ చైనా విషయంలో కలసికట్టుగా ఉండాలని సూచించింది.

ఐరోపా దేశాలను ఆ గ్రూపు విభజిస్తోందని, కాబట్టి ఆయా దేశాలన్నీ 27+1 కూటమినే అనుసరించాలని లిథువేనియా విదేశాంగ మంత్రి గేబ్రియల్ లండ్స్ బర్గ్ అన్నారు. అన్నీ ఆలోచించాకే తాము 17+1 నుంచి బయటకు వచ్చామని చెప్పారు. 2019లోనే తమపై చైనా గూఢచర్యం చేస్తున్నట్టు గుర్తించామని, చైనీస్ ఇంటెలిజెన్స్, సెక్యూరిటీ సర్వీసెస్ కార్యకలాపాలు సాగిస్తున్నట్టు తేలిందని అన్నారు. ఈ ఏడాది ఫిబ్రవరిలో విడుదలైన జాతీయ ముప్పు నివేదిక అంచనాలోనూ ఇదే విషయాన్ని లిథువేనియా ప్రస్తావించింది.