'ముఖేష్... ఇది కేవలం ట్రయిలరే'... లేఖలో అంబానీకి బెదిరింపులు!

ఆసియాలోనే అత్యంత ధనవంతుడిగా గుర్తింపు తెచ్చుకున్న రిలయన్స్‌ ఇండస్ట్రీస్‌ అధినేత ముఖేష్‌ అంబానీ నివాసమైన 'అంటీలియా' సమీపంలో పేలుడు పదార్థాలతో నిండిన వాహనం లభించడం తీవ్ర కలకలం రేపగా, తాజాగా అదే వాహనంలో ఓ బెదిరింపు లేఖను అధికారులు కనుగొన్నారు. డ్రైవర్ పక్కనే ఉండే సీటులో ముంబై ఇండియన్స్ క్రికెట్ జట్టు వాడేటటువంటి బ్యాగ్ ఉండగా దానిలో ఈ లేఖ బయటపడింది. ఇందులో ముఖేష్ తో పాటు నీతా అంబానీని సైతం ఆగంతుకులు బెదిరించారు.

అంబానీ ఫ్యామిలీని టార్గెట్ చేస్తూ రాసిన ఈ లేఖలో "నీతా అంబానీ, ముఖేష్‌ భయ్యాకు ఇదొక ఝలక్. మరోసారి ఈ పేలుడు పదార్థాలు మీ దగ్గరికి చేరుకుంటాయి. ఇది ట్రయిలర్ మాత్రమే" అని రాసుందని పోలీసు ఉన్నతాధికార వర్గాలు తెలిపాయి.

కాగా, ముఖేష్ ఇంటి బయట ఆగివున్న ఓ స్కార్పియోపై అనుమానంతో సోదాలు చేయగా, పేలుడు పదార్థాలు లభించిన సంగతి తెలిసిందే. ముఖేష్ కుటుంబం వాడే సెక్యూరిటీ వాహనం నంబర్ ఈ స్కార్పియోకు ఉంది. దీంతో ఈ వాహనాన్ని ఎక్కడో దొంగిలించి తెచ్చుంటారని పోలీసులు అనుమానిస్తున్నారు. ఈ వాహనంలో వచ్చిన వ్యక్తి మరో వాహనంలో వెళ్లిపోయాడని ఇప్పటికే గుర్తించిన ముంబై పోలీసులు, ఈ కేసును సీరియస్ గా తీసుకుని ఆగంతుకులను గుర్తించేందుకు ప్రత్యేక బృందాలను ఏర్పాటు చేసింది.