139 ఏళ్ల బంగళా.. వేరే అడ్రస్​ కు తరలివెళ్లింది: వీడియో వైరల్​

139 ఏళ్ల పాటు ఆ బంగళా చిరునామా అదే. కానీ, ఇప్పుడు మారిపోయింది. అలాగని ఆ ప్రాంతమేమీ మారలేదు. మారింది ఆ బంగళానే. ఓ చోటు నుంచి మరో చోటుకు తరలి వెళ్లింది. కొత్త ప్రాంతంలో కొత్తగా కొలువుదీరింది. అసలు కథేంటంటే..

అమెరికా శాన్ ఫ్రాన్సిస్కోలోని ఫ్రాంక్లిన్ స్ట్రీట్ లో విక్టోరియా హౌస్ అనే ఓ బంగళా ఉంది. మ్యాక్స్ ఇంగ్లాండర్ అనే ఓ వ్యక్తి అక్కడ 139 (1880లో) ఏళ్ల కిందట.. ఆరు బెడ్రూంలు, మూడు బాత్రూంలతో ఆ ఇంటిని నిర్మించుకున్నాడు. 1890లో అతడి మరణానంతరం అతడి కొడుకు ఆరోన్ కు ఆ ఇల్లు వారసత్వంగా వచ్చింది.

1920లో ఆరోన్ చనిపోయాక ఇల్లు పడావు పడిపోయింది. రిపేర్లకు వచ్చింది. ఇల్లు కట్టినదానికయ్యే ఖర్చు కన్నా.. ఆ రిపేర్లకే ఎక్కువవుతుండడంతో ఎవరూ దానిని కొనేందుకు ఆసక్తి చూపించలేదు. చివరకు 1990లో ఓ వ్యాపారి ఇంటిని కొన్నాడు. 2013లో దివాళా తీయడంతో అతడూ ఆ ఇంటిని వదిలేసుకున్నాడు.

అప్పటి నుంచి ఎన్నో చేతులు మారిన ఆ ఇంటిని.. ఇయాన్ బెర్కి అనే ఓ రియల్ ఎస్టేట్ వ్యాపారి 26.5 లక్షల డాలర్లకు కొన్నాడు. అయితే, ఇంటి కన్నా ఆ ఇల్లున్న స్థలం చాలా విలువైనది కావడం, ఎక్కువ స్థలం ఉండడంతో అక్కడ ఓ అపార్ట్ మెంట్ కట్టాలనుకున్నాడు. కానీ, ఆ ఇంటిని కూల్చకుండానే ఆ పని చేయాలనుకున్నాడు. అందులో భాగంగానే ఫ్రాంక్లిన్ స్ట్రీట్ నుంచి ఫుల్టన్ స్ట్రీట్ లోకి దానిని మార్చాడు.

అందుకోసం హైడ్రాలిక్స్ సాయంతో ఆ బంగళాను పైకి లేపి.. ఓ పెద్ద ట్రక్కుపై పెట్టారు. నెమ్మదిగా దానిని తరలించారు. ఓ మార్చురీ పక్కన నిలబెట్టారు. బంగళా తరలింపు కోసం అడ్డొచ్చిన చెట్లన్నింటినీ నరికేశారు. ట్రాఫిక్ లైట్ల స్తంభాలను కూల్చేశారు. ఇంతకుముందు ఆ ఇల్లున్న స్థలంలో దాదాపు 47 యూనిట్లుండే ఓ పెద్ద అపార్ట్ మెంట్ కాంప్లెక్స్ ను కట్టనున్నాడు ఇయాన్.