ట్రక్కుతో 8 సార్లు ఆసుపత్రిని ఢీ కొట్టిన వ్యక్తి.. 15 వాహనాలు ధ్వంసం.. వీడియో ఇదిగో

ఓ వ్యక్తి పికప్ ట్రక్ తో ఆసుపత్రిని దాదాపు 8 సార్లు ఢీ కొట్టాడు. అంతేగాక, అక్కడున్న వాహనాలను కూడా ఢీ కొడుతూ వాటిని ధ్వంసం చేశాడు. ఈ ఘటన హరియాణాలోని గురుగ్రామ్‌లోని బసాయి చౌక్ బాలాజీ ఆసుపత్రి వద్ద చోటు చేసుకుంది. ఆ ఆసుపత్రికి వైద్యం కోసం వచ్చిన తన కుటుంబ సభ్యులతో గొడవపడి ఆయన ఈ ఘటనకు పాల్పడినట్లు తెలుస్తోంది. కుటుంబంలోని ఇద్దరు పెద్దలను ఆసుపత్రికి తీసుకొచ్చిన నేపథ్యంలో వారి మధ్య గొడవ చోటు చేసుకోవడంతో అతడు కోపంతో ఈ ఘటనకు పాల్పడ్డాడు.

వాహనంతో అతడు దాదాపు 15  వాహనాలను ధ్వంసం చేశాడని బాలాజీ ఆసుపత్రి సిబ్బంది చెప్పారు. ఆ వ్యక్తికి చెందిన కుటుంబంలోని ఇద్దరికి తమ ఆసుపత్రిలోనే చికిత్స అందుతోన్న సమయంలో ఈ ఘటన చోటు చేసుకుందని వివరించారు. ఈ ఘటనపై తాము పోలీసులకు ఫిర్యాదు చేశామని, దర్యాప్తు కొనసాగుతోందని చెప్పారు.