కోట్ల విలువ చేసే పెయింటింగ్ ను చెత్తబుట్టలో వేసిన ఎయిర్ పోర్టు సిబ్బంది

కొన్ని రకాల పెయింటింగ్ లు చూడ్డానికి ఏమీ అర్థం కానట్టుగా కనిపిస్తాయి. కానీ వాటిలో ఇమిడివుండే అసాధారణ సందేశం, చిత్రకారుల బ్రాండ్ ఇమేజ్ కారణంగా అవి కోట్లలో ధర పలుకుతాయి. ఇలాంటిదే ఓ పెయింటింగ్ ను గమనించిన జర్మనీలోని ఓ విమానాశ్రయ సిబ్బంది అదేదో పనికిరాని వస్తువు అనుకుని చెత్తబుట్టలో వేశారు. కానీ దాని విలువ కోట్లల్లో ఉంటుందని అప్పటికి వారికి తెలియదు.

ఓ బిజినెస్ మేన్ జర్మనీ నుంచి ఇజ్రాయెల్ ప్రయాణించే క్రమంలో తన వద్ద ఉన్న రూ.2.5 కోట్ల విలువైన పెయింటింగ్ ను డ్యూసెల్డార్ఫ్ విమానాశ్రయంలో మర్చిపోయాడు. చెకింగ్ కౌంటర్ వద్ద ఆ పెయింటింగ్ ను వదిలేసి, వెళ్లి విమానంలో కూర్చున్నాడు. అయితే విమానం గాల్లోకి లేచిన తర్వాత ఆ వ్యాపారవేత్తకు తన పెయింటింగ్ గుర్తొచ్చింది. ఇజ్రాయెల్ చేరిన వెంటనే ఆ విషయాన్ని జర్మనీ పోలీసులకు మెయిల్ ద్వారా తెలిపాడు. ఆలస్యం అయితే కష్టమని భావించి ఆ విషయాన్ని బెల్జియంలో ఉన్న తన బంధువుకు తెలిపాడు.

వెంటనే ఆ బంధువు జర్మనీ వెళ్లి డ్యూసెల్డార్ఫ్ విమానాశ్రయం సమీప పోలీసులకు ఫిర్యాదు చేశాడు. వెంటనే రంగంలోకి దిగిన పోలీసులు విమానాశ్రయంలో క్షుణ్ణంగా తనిఖీలు చేయగా, ఆ పెయింటింగ్ ఓ చెత్తబుట్టలో దర్శనమిచ్చింది. గత బుధవారం ఆ పెయింటింగ్ ఎట్టకేలకు సొంతదారు వద్దకు చేరింది. ఆ పెయింటింగ్ ను ఓ ప్రముఖ ఫ్రెంచ్ చిత్రకారుడు గీశాడట.