కంగన రనౌత్‌పై పరువునష్టం కేసు.. కోర్టుకు హాజరైన జావేద్ అఖ్తర్

ప్రముఖ సినీనటి కంగనా రనౌత్ తన పరువుకు భంగం కలిగించేలా మాట్లాడారంటూ బాలీవుడ్ గేయ రచయిత జావెద్ అఖ్తర్ ఆమెపై పరువు నష్టం దావా వేశారు. ఈ కేసుకు సంబంధించి ముంబైలోని అంధేరీ కోర్టుకు ఈరోజు అఖ్తర్ హాజరయ్యారు. తన గుర్తింపు, ఫిర్యాదుకు సంబంధించిన ఆధారాలను కోర్టుకు చూపించారు. వివరాల వెరిఫికేషన్ పూర్తి కావడంతో... తదుపరి విచారణను కోర్టు ఈ నెల 19కి వాయిదా వేసింది.

కేసు వివరాల్లోకి వెళ్తే, ఇటీవల ఓ న్యూస్ ఛానల్ కు ఇచ్చిన ఇంటర్వ్యూలో నటుడు సుశాంత్ సింగ్ రాజ్ పుత్ అంశంపై కంగన మాట్లాడుతూ జావెద్ అఖ్తర్ పేరును ప్రస్తావించింది. ఆ ఇంటర్వ్యూకు ఆన్ లైన్లో లక్షలాది వ్యూస్ వచ్చాయి. దీంతో, తన పరువుకు భంగం కలిగించేలా కంగన వ్యాఖ్యానించిందని అఖ్తర్ కోర్టును ఆశ్రయించారు.