కొల్లు రవీంద్రను కావాలనే ఇరికించారు: కేశినేని నాని

హత్య కేసులో బెయిల్ పై విడుదలైన టీడీపీ నేత, మాజీ మంత్రి కొల్లు రవీంద్రను ఆ పార్టీ ఎంపీ కేశినేని నాని ఈరోజు పరామర్శించారు. మంత్రి పేర్ని నాని అనుచరుడు, మచిలీపట్నం వైసీపీ నేత మోకా భాస్కరరావు హత్య కేసులో కొల్లు రవీంద్ర ఆరోపణలు ఎదుర్కొంటున్న సంగతి తెలిసిందే.

ఈ సందర్భంగా కేశినేని నాని మాట్లాడుతూ, రాజకీయ కక్షల్లో భాగంగానే రవీంద్రను ఇరికించారని ఆరోపించారు. రవీంద్ర ఏ తప్పు చేయలేదనే విషయం అందరికీ తెలుసని చెప్పారు. ఆయన ఈ కేసులో నిర్దోషిగా బయటపడతారని చెప్పారు. రాష్ట్రంలో వైసీపీ అధికారంలోకి  వచ్చిన తర్వాత విపక్ష నేతలపై కక్ష సాధింపులు ఎక్కువయ్యాయని మండిపడ్డారు. ఇది ప్రభుత్వానికి మంచిది కాదని చెప్పారు. కక్ష సాధింపులను పక్కన పెట్టి, రాష్ట్ర అభివృద్ధిపై దృష్టి సారించాలని హితవు పలికారు.