దేశంలో సినీ, టీవీ షూటింగులకు కేంద్రం గ్రీన్ సిగ్నల్

కరోనా దెబ్బకు స్తంభించిపోయిన సినీ, టీవీ రంగాలకు ఊరటనిచ్చేలా కేంద్రం తాజా మార్గదర్శకాలు విడుదల చేసింది. లాక్ డౌన్ అనంతరం షూటింగులు ప్రారంభమైనా కరోనా కేసులు వస్తుండడంతో అవి నిలిచిపోయాయి. తాజాగా అన్ లాక్-3లో భాగంగా కేంద్రం సినీ, టీవీ షూటింగులకు అనుమతి ఇచ్చింది. అయితే, అనేక నిబంధనలను విధించింది. ఈ మేరకు కేంద్ర సమాచార, ప్రసార శాఖ మంత్రి ప్రకాశ్ జవదేకర్ ఓ ప్రకటన చేశారు. కెమెరా ముందు ఉండే నటీనటులు తప్ప మిగతా వాళ్లందరూ మాస్కులు వేసుకోవాల్సిందేనని స్పష్టం చేశారు.

• నటీనటులందరూ ఆరోగ్యసేతు యాప్ ఉపయోగించాలి.
• అవుట్ డోర్ షూటింగుల్లో యూనిట్ సభ్యులందరూ మాస్కులు తప్పనిసరిగా ధరించాలి.
• సాధ్యమైనంత తక్కువ సిబ్బందితో షూటింగ్ జరుపుకోవాలి.
• షూటింగ్ స్పాట్ లో సిబ్బంది తప్పకుండా థర్మల్ స్క్రీనింగ్ చేయించుకోవాలి.
• లొకేషన్ లో తాత్కాలిక ఐసోలేషన్ కేంద్రం ఏర్పాటు చేసుకోవాలి.
• నటీనటులతో సన్నిహితంగా ఉండాల్సిన మేకప్ సిబ్బంది తప్పనిసరిగా పీపీఈ కిట్లు ధరించాలి.
• షూటింగ్ సమయాల్లో విజిటర్లను అనుమతించరాదు.
• థియేటర్లలో భౌతికదూరం పాటిస్తూ సీటింగ్ ఏర్పాటు చేయాలి.
• టికెట్లు ఆన్ లైన్ లో మాత్రమే విక్రయించాలి.