కరోనాను సాధారణ జలుబు స్థాయికి తగ్గించే వీలుంది: ఇజ్రాయెల్ శాస్త్రవేత్తలు

కొలెస్ట్రాల్‌ను తగ్గించేందుకు ఉపయోగించే ఫెనోఫైబ్రేట్ ఔషధంతో కరోనాను సాధారణ జలుబు స్థాయికి తగ్గించే వీలుందని ఇజ్రాయెల్ శాస్త్రవేత్తలు తెలిపారు. కరోనా సోకిన వ్యక్తి ఊపిరితిత్తుల కణాలపై ప్రయోగశాలల్లో నిర్వహించిన పరిశోధనల్లో ఈ విషయం వెల్లడైనట్టు శాస్త్రవేత్తలు తెలిపారు. ఊపిరితిత్తుల్లో లిపిడ్‌కు సంబంధించిన జీవక్రియలను కరోనా వైరస్ అడ్డుకుంటోందని, దీనికి అడ్డుకట్ట వేయడం ద్వారా కరోనా లక్షణాలు పెరగకుండా చూడొచ్చని పేర్కొన్నారు.

శరీరంలో కొవ్వును కరిగించే సామర్థ్యాన్ని ఈ వైరస్ అడ్డుకుంటోందని, అయితే వైరస్ అడ్డుకున్న డీఎన్ఏ భాగాన్ని క్రియాశీలం చేయడం ద్వారా ఫెనోఫైబ్రేట్ ఔషధం ఆ ప్రక్రియను పునరుద్ధరిస్తుందని వివరించారు. ఫలితంగా వైరస్ పునరుత్పత్తి సామర్థ్యం తగ్గిపోవడమే కాక, సూక్ష్మజీవి పూర్తిగా అంతమయ్యే వీలుందని పరిశోధనలో పాల్గొన్న యాకోప్ నహ్మియాస్ తెలిపారు. దీంతో అది సాధారణ జలుబుగానే మిగిలిపోతుందని వివరించారు.