కరోనాపై పోరులో కీలక ముందడుగు... వైరస్ ను నిలువరించే యాంటీ బాడీ గుర్తింపు!

కరోనా సూక్ష్మ క్రిమిని శరీరంలో వ్యాపించనీయకుండా చేసే యాంటీ బాడీలను గుర్తించామని ఉట్రేచ్ యూనివర్శిటీ పరిశోధకులు ప్రకటించారు. 'నేచర్ కమ్యూనికేషన్స్' ఆన్ లైన్ మేగజైన్ ఈ వివరాలను వెల్లడించింది.

వర్శిటీ పరిధిలోని హెచ్ఎంబీ (ఎరాస్మస్ మెడికల్ సెంటర్ అండ్ హార్బర్ బయోమెట్) ఓ ప్రకటన విడుదల చేస్తూ, కరోనా చికిత్సలో ఇదో మైలురాయని అభివర్ణించింది. ఈ యాంటీ బాడీ, సార్స్ కోవ్-2లో ఓ కణాన్ని పట్టుకుని, దాని వ్యాప్తిని అడ్డుకుంటుందని రీసెర్చ్ కి నేతృత్వం వహించిన డాక్టర్ బాష్ వెల్లడించారు.

ఈ యాంటీ బాడీకి క్రాస్ న్యూట్రలైజింగ్ గుణాలుండటం తమకు ఆసక్తిని కలిగించిందని, కరోనా వైరస్ ను నిలువరించడంలో ఇది కీలక పాత్ర పోషిస్తుందని వెల్లడించారు. ఈ ప్రయోగాల్లో సార్స్ కోవ్ 1 యాంటీ బాడీలను వినియోగించామని తెలిపారు. ఈ పరిశోధనలపై స్పందించిన హెచ్బీఎం చైర్మన్ డాక్టర్ జింగ్ సాంగ్ వాంగ్, ప్రస్తుతం ఈ యాంటీ బాడీలు మానవ శరీరంలో వైరస్ ను ఏ మేరకు అడ్డుకుంటాయన్న అంశంపై మరిన్ని ప్రయోగాలు చేయాలని సంకల్పించామని, భాగస్వామ్య రీసెర్చర్లతో కలిసి ముందడుగు వేస్తామని తెలిపారు.