చేతులెలా శుభ్రం చేసుకోవాలి.. కేరళ పోలీసుల హ్యాండ్​ వాషింగ్​ డ్యాన్స్​ వైరల్​

కరోనా వైరస్ రోజురోజుకు వ్యాప్తి చెందుతుండటంతో ప్రపంచవ్యాప్తంగా ఆందోళన వ్యక్తమవుతోంది. వైరస్ కు ఇప్పటివరకు ఎలాంటి మందులు లేకపోవడంతో నివారణ చర్యలే మార్గం. ఎక్కువగా బయట తిరగొద్దని, ఎప్పటికప్పుడు చేతులను శుభ్రం చేసుకోవాలని ప్రపంచ ఆరోగ్య సంస్థ కూడా స్పష్టంగా చెబుతోంది. ఈ నేపథ్యంలో చేతులను ఎలా శుభ్రం చేసుకోవాలో చూపుతూ కేరళ పోలీసులు రూపొందించిన సరదా డ్యాన్స్ వీడియో సోషల్ మీడియాలో వైరల్ గా మారింది.

ఒక నిమిషం వీడియోలో..

కేవలం ఒక నిమిషం నాలుగు సెకన్ల పాటు ఉన్న ఈ వీడియోలో కేరళ పోలీసులు చేతులు శుభ్రం చేసుకునే తీరుపై అవగాహన కల్పించేందుకు ప్రయత్నించారు. ఈ సందర్భంగా వారు చేసిన డ్యాన్స్ సరదాగా, ఆసక్తికరంగా ఆకట్టుకునేలా ఉంది. ఆరుగురు పోలీసు సిబ్బంది కేరళ సినిమా ‘అయ్యప్పనుమ్ కోషియం’లోని ‘కలక్కథా..’ అంటూ సాగే హిట్ పాటతో ఈ వీడియో చేశారు.  

ఎనిమిది లక్షల మంది చూశారు.

కేరళ పోలీసులు ఫేస్ బుక్ లో పెట్టిన ఆ వీడియోను ఏకంగా ఎనిమిది లక్షల మందికిపైగా చూశారు. పెద్ద సంఖ్యలో లైకులు కూడా వచ్చాయి. 28 వేల మందికిపైగా షేర్ చేశారు కూడా. మొత్తంగా కేరళ పోలీసుల ప్రయత్నంపై చాలా మంది హర్షం వ్యక్తం చేశారు.