బెంగళూరు గూగుల్ ఉద్యోగికి కరోనా పాజిటివ్... వెంటనే ఉద్యోగులంతా ఇంటికి!

బెంగళూరులో ఉన్న గూగుల్ క్యాంపస్ లో ఓ ఉద్యోగికి కరోనా వైరస్ సోకినట్టు ఈ ఉదయం స్పష్టం కావడంతో, ఉద్యోగులంతా వెంటనే ఇంటికి వెళ్లిపోవాలని ఆదేశిస్తూ, వర్క్ ఫ్రమ్ హోమ్ అనుమతులను యాజమాన్యం మంజూరు చేసింది.

 ఈ మేరకు మీడియాకు ఓ ప్రకటన విడుదల చేసిన గూగుల్, "బెంగళూరులోని మా గూగుల్ శాఖలో విధులు నిర్వహిస్తున్న ఓ ఉద్యోగికి కోవిడ్-19 వైరస్ పాజిటివ్ అని రిపోర్టు వచ్చింది. దీంతో అతన్ని వెంటనే ఐసోలేషన్ వార్డుకు తరలించాం. ముందు జాగ్రత్త చర్యగా మా ఉద్యోగులను వర్క్ ఫ్రమ్ హోమ్ చేయాలని కోరాం" అని పేర్కొంది.

ఆ ఉద్యోగితో కలిసి పని చేసిన అందరి ఆరోగ్య పరిస్థితినీ పరిశీలిస్తున్నామని, వారందరినీ మరెవరితోనూ కలవకుండా విడిగా ఉంచామని తెలిపింది. సంస్థలో పనిచేసే వారి ఆరోగ్యం, క్షేమం తమకు అత్యంత ప్రాధాన్యతాంశాలని వెల్లడించింది.