కరోనా మహమ్మారిని జయించిన 98 ఏళ్ల శాస్త్రవేత్త

కరోనా వైరస్ బీభత్సం ఇప్పట్లో ఆగేట్టు కనిపించడంలేదు. చైనా వెలుపల కూడా భారీగా మరణాలు నమోదవుతున్నాయి. ఇటలీలో  ఒక్కరోజే 196 మంది కరోనాతో మరణించారన్న వార్తలు భీతిగొలుపుతున్నాయి. ఈ నేపథ్యంలో, ఆశ్చర్యకరంగా చైనాలో ఓ వృద్ధ శాస్త్రవేత్త, ఆయన భార్య కరోనా మహమ్మారి నుంచి కోలుకోవడం ఆశ్చర్యం కలిగిస్తోంది. హాన్ తియాన్ క్వీ అనే ఆ శాస్త్రవేత్త వయసు 98 సంవత్సరాలు కాగా, ఆయన భార్య వయసు 85 ఏళ్లు. ఇంతటి వృద్ధాప్యంలోనూ వారు కరోనా బారి నుంచి ఆరోగ్యంగా బయటపడడం చర్చనీయాంశంగా మారింది. ఫిబ్రవరి మధ్యలో ఈ దంపతులు కరోనా లక్షణాలతో ఆసుపత్రిలో చేరారు. 18 రోజుల పాటు కరోనాతో పోరాడిన ఈ జంట దిగ్విజయంగా ఆసుపత్రి నుంచి డిశ్చార్జ్ అయింది.