విదేశీయులకు ప్రవేశం లేదు: కరోనా విజృంభణ నేపథ్యంలో అరుణాచల్‌ ప్రదేశ్‌ కీలక నిర్ణయం

కరోనా వైరస్‌ విజృంభణ నేపథ్యంలో అరుణాచల్‌ ప్రదేశ్‌ ప్రభుత్వం తమ రాష్ట్రంలోకి విదేశీయుల రాకను నిలిపేస్తూ కీలక నిర్ణయం తీసుకుంది. ప్రొటెక్టెడ్‌ ఏరియా పర్మిట్స్‌ ను తాత్కాలికంగా రద్దు చేస్తున్నట్లు తెలిపింది. ఈ మేరకు పీఏపీ ఇష్యూయింగ్‌ అథారిటీలకు ఆ రాష్ట్ర ప్రభుత్వ ప్రధాన కార్యదర్శి నరేశ్ కుమార్‌ ఆదేశాలిచ్చారు.

'భారత్‌లో కరోనా వైరస్‌ కేసులు నమోదవుతున్నాయి. ఈ కేసులు పెరిగిపోతున్నాయి. విదేశాల నుంచి వచ్చిన వారి నుంచే ఈ కరోనా వైరస్‌ వ్యాప్తి జరుగుతుందని తెలుస్తోంది. అలాగే, విదేశాల నుంచి టూర్‌కు వచ్చిన వారి నుంచి ఈ వైరస్‌ వ్యాప్తిస్తోంది. అందుకే అరుణాచల్‌ ప్రదేశ్‌లో కరోనా వైరస్‌ వ్యాప్తిని అరికట్టడానికి ఈ చర్యలు తీసుకుంటున్నాం. తాత్కాలికంగా పీఏపీను సస్పెండ్‌ చేస్తూ నిర్ణయం తీసుకున్నాం' అని ఆ రాష్ట్ర ప్రభుత్వం ప్రకటించింది. కాగా, భారత్‌లో వైరస్‌ సోకిన వారి సంఖ్య 39కి చేరింది.