Bitcoin: మార్కెట్ వాల్యూలో అమెజాన్ ను మించిపోయిన బిట్ కాయిన్
- దూసుకుపోతున్న బిట్ కాయిన్
- ప్రస్తుతం ఒక బిట్ కాయిన్ విలువ 93,546 డాలర్లు
- 24 గంటల వ్యవధిలోనే 6.2 శాతం వృద్ధి
ప్రముఖ క్రిప్టో కరెన్సీ బిట్‌కాయిన్ మార్కెట్ విలువ పరంగా మరో కీలక మైలురాయిని అధిగమించింది. టెక్ దిగ్గజం అమెజాన్‌ను వెనక్కి నెట్టి, ప్రపంచంలోనే 6వ అతిపెద్ద సంపదగా అవతరించింది. ఇటీవలి కాలంలో బిట్‌కాయిన్ ప్రదర్శిస్తున్న జోరుకు ఇది నిదర్శనంగా నిలుస్తోంది.
కంపెనీస్‌ మార్కెట్ క్యాప్.కామ్ అందించిన తాజా సమాచారం ప్రకారం, బిట్‌కాయిన్ మార్కెట్ క్యాపిటలైజేషన్ (మార్కెట్ విలువ) 1.857 ట్రిలియన్ డాలర్లకు చేరుకుంది. ఇదే సమయంలో అమెజాన్ మార్కెట్ విలువ 1.837 ట్రిలియన్ డాలర్లుగా నమోదైంది. ఈ పరిణామంతో బిట్‌కాయిన్ ప్రపంచ అత్యంత విలువైన ఆస్తుల టాప్-10 జాబితాలో ఎగబాకింది. గత కొన్ని రోజులుగా బిట్‌కాయిన్ ధర గణనీయంగా పెరుగుతోంది. కేవలం 24 గంటల వ్యవధిలోనే 6.2 శాతం వృద్ధి చెంది, ఒక బిట్ కాయిన్ విలువ 93,546 డాలర్ల స్థాయికి చేరుకుంది. గతంలో బుల్ మార్కెట్ గరిష్ఠ స్థాయిలను ఈ ధర గుర్తుచేస్తోంది.
మరోవైపు, అమెజాన్ షేర్లు బుధవారం 3.5 శాతం పెరిగి 173.18 డాలర్ల వద్ద ముగిసినప్పటికీ, ఈ సంవత్సరం ప్రారంభం నుంచి చూస్తే 21 శాతం పైగా నష్టపోయాయి. గత 12 నెలల కాలంలో అమెజాన్ షేర్లు 3.5 శాతం ప్రతికూల రాబడిని ఇవ్వగా, ఇదే కాలంలో బిట్‌కాయిన్ 40 శాతం పైగా లాభాలను ఆర్జించడం గమనార్హం. ఇక, ఆల్ఫాబెట్ (గూగుల్) మార్కెట్ క్యాప్ 1.859 ట్రిలియన్ డాలర్లతో ఐదో స్థానంలో ఉంది. ప్రపంచంలో అత్యంత విలువైన ఆస్తిగా మాత్రం బంగారం 22.5 ట్రిలియన్ డాలర్ల భారీ మార్కెట్ క్యాప్‌తో తన ఆధిపత్యాన్ని కొనసాగిస్తోంది.
బిట్‌కాయిన్ ధరల పెరుగుదలకు ప్రధానంగా సంస్థాగత పెట్టుబడులు పెరగడం, స్పాట్ బిట్‌కాయిన్ ఈటీఎఫ్‌లలోకి నిధుల ప్రవాహం కొనసాగడం వంటి అంశాలు దోహదం చేస్తున్నాయని మార్కెట్ నిపుణులు విశ్లేషిస్తున్నారు. "ఈ ర్యాలీకి సంస్థాగత కొనుగోళ్లు ఊతమిస్తున్నాయి. బిట్‌కాయిన్ స్పాట్ ఈటీఎఫ్‌లలోకి నికరంగా 700 మిలియన్ డాలర్లకు పైగా నిధులు ప్రవహించాయి. ఒక్క ఈ వారంలోనే మొత్తం ప్రవాహం 1 బిలియన్ డాలర్లు దాటింది" అని ముడ్రెక్స్ సహ వ్యవస్థాపకుడు, సీఈఓ ఎడుల్ పటేల్ తెలిపారు.
