Sadhguru: ఉగ్రవాదులపై ఉక్కుపాదం మోపాలి: సద్గురు
- జమ్మూ కశ్మీర్ పహల్గామ్ ఉగ్రదాడిపై సద్గురు తీవ్ర ఖండన
- ఉగ్రవాదులను ఉక్కుపాదంతో అణచివేయాలని సూచన
- సమాజంలో భయం సృష్టించి, విభజించడమే ఉగ్రవాద లక్ష్యమని వ్యాఖ్య
- మృతుల కుటుంబాలకు ప్రగాఢ సానుభూతి
- విభేదాలు పక్కనపెట్టి జాతి ఐక్యంగా భద్రతా దళాలకు అండగా నిలవాలని పిలుపు
జమ్మూ కశ్మీర్‌లోని పహల్గామ్‌లో పర్యాటకులపై జరిగిన ఉగ్రవాద దాడిని ఈశా ఫౌండేషన్ వ్యవస్థాపకులు, ఆధ్యాత్మిక గురువు సద్గురు జగ్గీ వాసుదేవ్ తీవ్రంగా ఖండించారు. ఇది అత్యంత హేయమైన, నీచమైన చర్య అని అభివర్ణిస్తూ, ఇలాంటి శక్తులను ఉక్కుపాదంతో అణచివేయాల్సిన అవసరం ఉందని స్పష్టం చేశారు.
పహల్గామ్‌లోని బైసరన్‌లో సాయుధ ఉగ్రవాదులు పర్యాటకులను లక్ష్యంగా చేసుకుని జరిపిన ఈ మెరుపుదాడిలో ప్రాణాలు కోల్పోయిన వారి కుటుంబాలకు సద్గురు తన ప్రగాఢ సానుభూతిని తెలియజేశారు. ఉగ్రవాద దాడుల వెనుక ఉన్న విస్తృత ఉద్దేశాలను వివరిస్తూ, జాతి మొత్తం సంయమనంతో, ఐక్యంగా స్పందించాల్సిన ప్రాముఖ్యతను ఆయన నొక్కిచెప్పారు.
"ఉగ్రవాదం ఉద్దేశం యుద్ధం కాదు, సమాజంలో భయాన్ని చొప్పించి నిర్వీర్యం చేయడమే. భయాందోళనలు వ్యాప్తి చేయడం, సమాజాన్ని చీల్చడం, దేశ ఆర్థిక ప్రగతిని అడ్డుకోవడం, ప్రతీ స్థాయిలో అరాచకాన్ని సృష్టించడమే వారి లక్ష్యం" అని సద్గురు ఎక్స్ వేదికగా పేర్కొన్నారు.
"ఈ దేశ సార్వభౌమత్వాన్ని పరిరక్షించుకోవాలంటే, ఇలాంటి శక్తులను ఉక్కుపాదంతో, దీర్ఘకాలిక దృఢ నిశ్చయంతో అణచివేయాలి" అని ఆయన స్పష్టం చేశారు. మతం, కులం, ప్రాంతం, రాజకీయ విభేదాలకు అతీతంగా దేశ ప్రజలంతా ఏకతాటిపై నిలవాలని, తమ కర్తవ్యాలను నిర్వర్తిస్తున్న భద్రతా బలగాలకు అన్ని విధాలా సంపూర్ణ మద్దతు ప్రకటించాలని ఆయన పిలుపునిచ్చారు.
ఉగ్రవాదం సృష్టించే సవాళ్లకు దీర్ఘకాలిక పరిష్కారాలు కూడా అవసరమని, విద్య, ఆర్థిక అవకాశాలు, సంక్షేమం వంటివి అన్ని స్థాయిలలో సమానంగా పంపిణీ చేయడం ముఖ్యమని సద్గురు అభిప్రాయపడ్డారు. కాగా, ఈ దాడికి పాల్పడిన ఉగ్రవాదుల కోసం భద్రతా దళాలు ముమ్మర గాలింపు చర్యలు చేపట్టాయి. జాతీయ దర్యాప్తు సంస్థ (ఎన్ఐఏ) బృందం కూడా దర్యాప్తులో స్థానిక పోలీసులకు సహకరిస్తోంది.
