Shreshta Iyer: క్రికెట్ స్టార్ శ్రేయస్ అయ్యర్ సోదరిపై ట్రోలింగ్.. ఘాటుగా స్పందించిన శ్రేష్ఠ!
- పంజాబ్ కింగ్స్ ఓటమి తర్వాత క్రికెటర్ శ్రేయస్ అయ్యర్ సోదరిపై ట్రోలింగ్
- కుటుంబాన్ని నిందించడం సిగ్గుచేటంటూ శ్రేష్ఠ అయ్యర్ తీవ్ర ఆగ్రహం
- ఇన్‌స్టాగ్రామ్ స్టోరీ ద్వారా విమర్శకులకు ఘాటు సమాధానం.
ఐపీఎల్ లో పంజాబ్ కింగ్స్ ఓటమి పాలైన తర్వాత కొందరు నెటిజన్లు టీమిండియా స్టార్ క్రికెటర్ శ్రేయస్ అయ్యర్ సోదరి శ్రేష్ఠ అయ్యర్‌ను లక్ష్యంగా చేసుకుని ట్రోలింగ్ చేశారు. దీనిపై ఆమె తీవ్రంగా స్పందించారు. జట్టుకు మద్దతు తెలిపినందుకు కుటుంబాన్ని నిందించడం దారుణమని ఇన్‌స్టాగ్రామ్ వేదికగా ఆగ్రహం వ్యక్తం చేశారు.
ఏప్రిల్ 20న జరిగిన ఐపీఎల్ మ్యాచ్‌లో రాయల్ ఛాలెంజర్స్ బెంగళూరు చేతిలో పంజాబ్ కింగ్స్ ఓటమి పాలైంది. అంతకు కొన్ని రోజుల క్రితం ఆర్సీబీని ఓడించిన పంజాబ్, ఈ మ్యాచ్ లో మాత్రం ఓడిపోయింది. ఈ మ్యాచ్‌లో పంజాబ్ జట్టు ఒత్తిడికి గురై ఓటమి చెందడంతో కొందరు అభిమానులు శ్రేయస్ అయ్యర్ కుటుంబ సభ్యులను లక్ష్యంగా చేసుకుని విమర్శలకు దిగారు. ఈ పరిణామంపై శ్రేయస్ అయ్యర్ సోదరి శ్రేష్ఠ అయ్యర్ తీవ్ర అసంతృప్తి వ్యక్తం చేశారు.
కేవలం మద్దతు ఇవ్వడానికి వచ్చినందుకు కుటుంబాన్ని నిందించే స్థాయికి కొందరు దిగజారడం నిజంగా నిరాశ కలిగిస్తోందని శ్రేష్ఠ తన ఇన్‌స్టాగ్రామ్ స్టోరీలో పేర్కొన్నారు. "మేము మైదానంలో ఉన్నా, దూరం నుంచి ప్రోత్సహించినా జట్టుకు మా మద్దతు ఎల్లప్పుడూ ఉంటుంది. నాపై వేలెత్తి చూపిస్తున్న వారి సంకుచిత మనస్తత్వం నవ్వొచ్చేలాగే కాదు, సిగ్గుచేటుగా కూడా ఉంది. నేను ఎన్నో మ్యాచ్‌లకు హాజరయ్యాను, వాటిలో చాలా వరకు విజయాలే ఉన్నాయి. కానీ స్క్రీన్ వెనుక దాక్కుని ట్రోల్ చేసేవారికి వాస్తవాలు పట్టవు కాబోలు" అని ఆమె ఘాటుగా వ్యాఖ్యానించారు.
ఇదిలా ఉండగా, శ్రేష్ఠ అయ్యర్‌ను విరాట్ కోహ్లీ అభిమానులు దూషించారంటూ ఒక నెటిజన్ చేసిన ట్వీట్ సోషల్ మీడియాలో వైరల్ అయింది. గతంలో శుభ్‌మన్ గిల్ సోదరి, రోహిత్ శర్మ కుమార్తె, కేఎల్ రాహుల్ భార్య కూడా ఇలాంటి దూషణలకు గురయ్యారని, ఇప్పుడు శ్రేష్ఠ అయ్యర్ వంతు వచ్చిందని ఆ ట్వీట్‌లో సదరు నెటిజన్ ఆరోపించాడు. అయితే, ఈ ఆరోపణలపై అధికారికంగా ఎటువంటి ధృవీకరణ లేదు.
