NASA: అంగారకుడిపై మిస్టరీ శిల!
- అంగారకుడిపై వింత రాయిని గుర్తించిన నాసా పెర్సెవరెన్స్ రోవర్
- చుట్టూ లేత రంగు ప్రాంతం ఉండగా, ఈ రాయి ముదురు రంగులో, గుంతలతో ఉన్న వైనం
- రాయి మూలాలపై శాస్త్రవేత్తల బృందం పరిశోధన
అంగారక గ్రహంపై పరిశోధనలు చేస్తున్న అమెరికా అంతరిక్ష పరిశోధనా సంస్థ (నాసా)కు చెందిన పెర్సెవరెన్స్ రోవర్ ఒక వింత ఆకారాన్ని గుర్తించింది. చూడటానికి అచ్చం మనిషి పుర్రెలా కనిపిస్తున్న ఓ రాయి చిత్రాన్ని రోవర్ భూమికి పంపింది. 'స్కల్ హిల్' (పుర్రె కొండ) అని నాసా నామకరణం చేసిన ఈ రాయి పుట్టుకపై ప్రస్తుతం అనేక ఊహాగానాలు వ్యక్తమవుతున్నాయి.
నాసా పెర్సెవరెన్స్ రోవర్ అంగారకుడిపై ఉన్న జెజెరో బిలం అంచున తన పరిశోధనలు కొనసాగిస్తోంది. ఈ క్రమంలో ఏప్రిల్ 11న రోవర్‌లోని శక్తివంతమైన మాస్ట్‌క్యామ్-జెడ్ కెమెరాకు ఒక ప్రత్యేకమైన రాయి కనిపించింది. ఆ ప్రాంతంలోని మిగతా రాళ్లు, నేల లేత రంగులో ఉండగా, ఈ రాయి మాత్రం ముదురు రంగులో, కోణాలతో, ఉపరితలంపై చిన్న చిన్న గుంతలతో విభిన్నంగా ఉంది. దీని ఆకారం పుర్రెను పోలి ఉండటంతో నాసా శాస్త్రవేత్తలు దీనికి 'స్కల్ హిల్' అని పేరు పెట్టారు.
ఈ 'పుర్రె శిల' ఎలా ఏర్పడిందనే దానిపై స్పష్టత లేదు. "ఈ రాయి దాని చుట్టూ ఉన్న లేత రంగు ప్రాంతానికి భిన్నంగా ముదురు రంగులో, కోణాలతో కూడిన ఉపరితలంతో, కొన్ని గుంతలతో ప్రత్యేకంగా నిలుస్తోంది" అని నాసా ఒక ప్రకటనలో వివరించింది. ఈ రాయిపై ఉన్న గుంతలు గాలి వలన ఏర్పడిన కోత వల్ల లేదా అందులోని చిన్న చిన్న ఖనిజాలు కాలక్రమేణా తొలిగిపోవడం వల్ల ఏర్పడి ఉండవచ్చని నాసా భావిస్తోంది.
మరోవైపు, ఇది సమీపంలోని ఏదైనా అగ్నిశిల భాగం కావచ్చని, లేదా గతంలో ఏదైనా గ్రహశకలం ఢీకొన్నప్పుడు ఎగిరివచ్చి ఇక్కడ పడిన ముక్క అయి ఉండవచ్చని కూడా శాస్త్రవేత్తలు అంచనా వేస్తున్నారు. స్కల్ హిల్' రాయి రంగు, గతంలో క్యూరియాసిటీ రోవర్ గేల్ బిలంలో కనుగొన్న ఉల్కలను పోలి ఉందని నాసా బృందం అభిప్రాయపడింది.
ప్రస్తుతం నాసా శాస్త్రవేత్తల బృందం ఈ 'స్కల్ హిల్' రాయి ఎక్కడి నుంచి వచ్చింది, దాని పుట్టుకకు కారణాలు ఏంటి అనే విషయాలపై లోతైన పరిశోధనలు చేస్తోంది. ఈ రాయిని విశ్లేషించడం ద్వారా అంగారకుడి భౌగోళిక చరిత్ర, అక్కడి వాతావరణ మార్పుల గురించి మరిన్ని కీలక వివరాలు తెలుసుకునే అవకాశం ఉందని శాస్త్రవేత్తలు ఆశాభావం వ్యక్తం చేస్తున్నారు. అంగారకుడిపై జీవం ఆనవాళ్ల కోసం జరుగుతున్న అన్వేషణలో భాగంగా ఇలాంటి వింతైన ఆకారాలు, రాళ్ల అధ్యయనం కీలక పాత్ర పోషిస్తుంది.
