Nazriya Nazim: నేను కొంతకాలంగా ఎవరితో కలవకపోవడానికి కారణం ఇదే: నజ్రియా నజీమ్
- కొంతకాలంగా మానసిక ఇబ్బందులు ఎదుర్కొంటున్నట్లు తెలిపిన నటి నజ్రియా
- సోషల్ మీడియా, వ్యక్తిగత వేడుకలకు దూరంగా ఉండటానికి కారణం ఇదేనని వెల్లడి.
- అందుబాటులో లేనందుకు క్షమాపణలు కోరుతూ భావోద్వేగ లేఖ విడుదల.
- విడాకుల వదంతులకు పరోక్షంగా తెరదించిన నజ్రియా.
రాజా రాణి', 'అంటే సుందరానికీ' వంటి చిత్రాలతో తెలుగు ప్రేక్షకులకు సుపరిచితురాలైన ప్రముఖ నటి నజ్రియా నజీమ్. గత కొంతకాలంగా సోషల్ మీడియాకు మరియు ఇతర కార్యక్రమాలకు దూరంగా ఉంటున్నారు. దీనిపై రకరకాల ఊహాగానాలు వెలువడిన నేపథ్యంలో, నజ్రియా తాజాగా ఒక భావోద్వేగ పోస్ట్ ద్వారా తన మౌనానికి గల కారణాన్ని స్వయంగా వెల్లడించారు. తాను మానసికంగా కొన్ని ఇబ్బందులు ఎదుర్కొంటున్నానని, అందుకే ఈ విరామం తీసుకున్నానని ఆమె స్పష్టం చేశారు.
గతేడాది 'సూక్ష్మ దర్శిని' (మలయాళ చిత్రం) షూటింగ్ పూర్తయినప్పటి నుంచి నజ్రియా సోషల్ మీడియాలో గానీ, బయట కార్యక్రమాల్లో గానీ పెద్దగా కనిపించలేదు. దీంతో ఆమె వ్యక్తిగత జీవితంపై పలు వదంతులు మొదలయ్యాయి. ఈ క్రమంలో, నజ్రియా తన అభిమానులను, శ్రేయోభిలాషులను ఉద్దేశిస్తూ ఒక సుదీర్ఘమైన నోట్‌ను విడుదల చేశారు. "నేను కొంతకాలంగా అందరికీ దూరంగా ఉంటున్నాను. కొన్ని వ్యక్తిగత కారణాల వల్ల సోషల్ మీడియాలో యాక్టివ్‌గా లేను" అని ఆమె తన పోస్ట్‌లో పేర్కొన్నారు.
తన 30వ పుట్టినరోజు వేడుకలు, నూతన సంవత్సర వేడుకలు, చివరకు తన సినిమా విజయోత్సవ కార్యక్రమాలు సహా ఎన్నో ముఖ్యమైన క్షణాలను తాను కోల్పోయానని ఆమె ఆవేదన వ్యక్తం చేశారు. ఈ కాలంలో తనను సంప్రదించడానికి ప్రయత్నించిన వారు, తన యోగక్షేమాలు తెలుసుకోవడానికి ఆసక్తి చూపిన వారు, అలాగే తమ సినిమాల్లో పాత్రలు ఇవ్వడానికి ఫోన్లు చేసిన వారి పట్ల తాను స్పందించలేకపోయానని, ఇందుకు అందరినీ క్షమించమని కోరారు. "ఇది నాకు చాలా కఠినమైన సమయం. నేను త్వరలోనే కోలుకుని మీ ముందుకు వస్తాను" అని ఆమె ఆశాభావం ఇచ్చారు.
ఇదే సమయంలో, తన పోస్ట్ ద్వారా నజ్రియా పరోక్షంగా తనపై వస్తున్న విడాకుల వదంతులకు కూడా తెరదించారు. కొంతకాలంగా ఆమె భర్త ఫహద్ ఫాజిల్‌తో కలిసి కనిపించకపోవడంతో వారిద్దరూ విడిపోతున్నారనే వార్తలు ప్రచారంలోకి వచ్చాయి. అయితే, తన తాజా పోస్ట్ చివరలో ఆమె తన పేరును 'నజ్రియా నజీమ్ ఫహద్' అని స్పష్టంగా పేర్కొనడంతో, ఆ వార్తలకు బలం లేదని తేలిపోయింది.
ఈ కష్టకాలంలోనూ ఒక శుభవార్తను పంచుకున్నారు నజ్రియా. తాను ఉత్తమ నటిగా కేరళ రాష్ట్ర చలనచిత్ర పురస్కారాన్ని అందుకున్నట్లు ఆమె తన పోస్ట్ ద్వారా తెలియజేశారు. నజ్రియా చేసిన ఈ ఎమోషనల్ పోస్ట్‌కు పలువురు సినీ ప్రముఖులు, అభిమానుల నుంచి మద్దతు లభిస్తోంది. నటి సమంత కూడా ఈ పోస్ట్‌ను లైక్ చేయడం గమనార్హం. నజ్రియా త్వరగా కోలుకోవాలని అభిమానులు ఆకాంక్షిస్తున్నారు.
