Aamazon-Flipkart: అమెజాన్, ఫ్లిప్ కార్ట్ పై కేంద్రం చర్యలు... ఎందుకంటే...!
- ఈ-కామర్స్ వేదికల్లో నాణ్యత లేని వస్తువుల విక్రయాలు
- దాడులు జరిపిన బీఐఎస్
- అమెజాన్, ఫ్లిప్‌కార్ట్‌లలో బీఐఎస్ ధృవీకరణ లేని ఉత్పత్తుల గుర్తింపు
- టెక్‌విజన్ ఇంటర్నేషనల్ ప్రైవేట్ లిమిటెడ్‌పై కేసులు నమోదు.
ప్రముఖ ఈ-కామర్స్ వేదికలు అమెజాన్, ఫ్లిప్ కార్ట్ పై కేంద్రం ఆగ్రహం వ్యక్తం చేసింది. నాణ్యత లేని ఉత్పత్తుల విక్రయాలు చేపడుతున్నాయంటూ ఆ రెండు సంస్థలపై చర్యలు చేపట్టింది. భారత ప్రమాణాల సంస్థ (బీఐఎస్) తాజాగా అమెజాన్, ఫ్లిప్‌కార్ట్ వంటి ప్రముఖ ఈ-కామర్స్ వేదికల గోదాంలపై దాడులు నిర్వహించి, నాణ్యత ప్రమాణాలు లేని ఉత్పత్తులను గుర్తించి స్వాధీనం చేసుకుంది. లక్నో, గురుగ్రామ్, ఢిల్లీ నగరాల్లోని గోదాంల్లో ఈ తనిఖీలు జరిగాయి.
లక్నోలోని అమెజాన్ గిడ్డంగిలో మార్చి 7న జరిపిన తనిఖీల్లో 215 బొమ్మలు, 24 హ్యాండ్ బ్లెండర్లు బీఐఎస్ ధృవీకరణ లేకుండా విక్రయిస్తున్నట్లు గుర్తించారు. ఫిబ్రవరిలో గురుగ్రామ్‌లోని అమెజాన్ గిడ్డంగిలో 58 అల్యూమినియం ఫాయిల్స్, 34 లోహపు నీళ్ల సీసాలు, 25 బొమ్మలు, 20 హ్యాండ్ బ్లెండర్లు, 7 పీవీసీ కేబుల్స్, 2 ఫుడ్ మిక్సర్లు, 1 స్పీకర్ ధృవీకరణ లేకుండా గుర్తించారు.
అలాగే, గురుగ్రామ్‌లోని ఫ్లిప్‌కార్ట్ గిడ్డంగిలో 534 స్టెయిన్‌లెస్ స్టీల్ వాటర్ బాటిల్స్, 134 బొమ్మలు, 41 స్పీకర్లు నాణ్యత ప్రమాణాలు లేకుండా ఉన్నట్లు గుర్తించారు. ఈ ఉత్పత్తులన్నీ ఇన్స్టాకార్ట్ సర్వీసెస్ ప్రైవేట్ లిమిటెడ్ నిర్వహిస్తున్న గోదాంలో లభ్యమయ్యాయి.
అమెజాన్, ఫ్లిప్‌కార్ట్‌లలోని ఉల్లంఘనలపై బీఐఎస్ విచారణలో టెక్‌విజన్ ఇంటర్నేషనల్ ప్రైవేట్ లిమిటెడ్ ద్వారా ఈ ఉత్పత్తులు సరఫరా అవుతున్నట్లు గుర్తించారు. దీంతో ఢిల్లీలోని టెక్‌విజన్ ఇంటర్నేషనల్ కు చెందిన రెండు వేర్వేరు కేంద్రాలపై బీఐఎస్ దాడులు నిర్వహించింది. ఈ దాడుల్లో ధృవీకరణ లేని సుమారు 7,000 ఎలక్ట్రిక్ వాటర్ హీటర్లు, 4,000 ఎలక్ట్రిక్ ఫుడ్ మిక్సర్లు, 95 ఎలక్ట్రిక్ రూమ్ హీటర్లు, 40 గ్యాస్ స్టవ్‌లను గుర్తించారు.
డిజిస్మార్ట్, యాక్టివా, ఇన్ల్సా, సెల్లో స్విఫ్ట్, బటర్‌ఫ్లై వంటి బ్రాండ్లకు చెందిన ధృవీకరణ లేని ఉత్పత్తులను స్వాధీనం చేసుకున్నారు. బాధ్యులపై బీఐఎస్ చట్టం-2016 ప్రకారం చర్యలు తీసుకోనున్నారు. టెక్‌విజన్ ఇంటర్నేషనల్ ప్రైవేట్ లిమిటెడ్‌పై ఇప్పటికే రెండు కేసులు నమోదు చేశారు. ఇతర స్వాధీనం చేసుకున్న వాటికి సంబంధించి మరిన్ని కేసులు నమోదు చేసే ప్రక్రియలో ఉన్నారు.
వినియోగదారుల ఉత్పత్తులు భద్రత, నాణ్యత ప్రమాణాలకు అనుగుణంగా ఉన్నాయో లేదో నిర్ధారించడానికి బీఐఎస్ మార్కెట్ నిఘా నిర్వహిస్తోంది. దీనిలో భాగంగా, సాధారణంగా ఉపయోగించే ప్రెషర్ కుక్కర్లు, హ్యాండ్ హెల్డ్ బ్లెండర్లు, ఫుడ్ మిక్సర్లు, ఎలక్ట్రిక్ ఇస్త్రీ పెట్టెలు, రూమ్ హీటర్లు, పీవీసీ కేబుల్స్, గ్యాస్ స్టవ్‌లు, బొమ్మలు, ద్విచక్ర వాహన హెల్మెట్లు, స్విచ్‌లు, సాకెట్లు, అల్యూమినియం ఫాయిల్స్ వంటి వాటిని కొనుగోలు చేసి, వాటి నాణ్యతను పరీక్షిస్తుంది. నాణ్యత లేని ఉత్పత్తుల వల్ల కలిగే ప్రమాదాలను దృష్టిలో ఉంచుకుని కేంద్ర ప్రభుత్వం బీఐఎస్ ధృవీకరణను తప్పనిసరి చేసింది.
