Kubera: బిచ్చగాడి పాత్రలో నటుడు ధనుష్!
- 'కుబేర' చిత్రంలో బిచ్చగాడుగా ధనుష్
- కన్‌ఫర్మ్‌ చేసిన శేఖర్ కమ్ముల
- 'కుబేర' లో కీలక పాత్రలో నాగార్జున
వైవిధ్యమైన పాత్రలతో నటుడిగా తన ప్రతిభను నిరూపించుకున్నాడు తమిళ కథానాయకుడు ధనుష్. ఇప్పటివరకు పలు విభిన్న పాత్రల్లో నటించి గొప్ప నటుడిగా ప్రశంసలు అందుకున్న ఈ నటుడు, త్వరలో బిచ్చగాడి పాత్రలో కనిపించబోతున్నాడు. తెలుగులో పలు చిత్రాలతో దర్శకుడిగా తనకంటూ ఒక ప్రత్యేక గుర్తింపును తెచ్చుకున్న శేఖర్ కమ్ముల దర్శకత్వంలో ధనుష్ హీరోగా నటిస్తున్న చిత్రం 'కుబేర'. ఈ చిత్రంలో అక్కినేని నాగార్జున కూడా ఓ కీలక పాత్రలో కనిపించనున్నాడు.
ఈ చిత్రంలో ధనుష్ బిచ్చగాడి పాత్రలో నటిస్తున్నాడని శేఖర్ కమ్ముల ఇటీవల ఒక మీడియా ఇంటర్వ్యూలో వెల్లడించారు. "మొదట్లో ఈ పాత్ర కోసం ధనుష్‌ను సంప్రదించడానికి కాస్త సందేహించాను. కానీ కథ చెప్పడానికి వెళ్ళినప్పుడు, ఆయన నా చిత్రాలకు, నా పని శైలికి పెద్ద అభిమానినని చెప్పారు. అంతేకాదు, కథను ఎంతో ఓపికగా విని వెంటనే అంగీకరించారు. ఆయన నిరాడంబరతను చూసి నాకు ఆశ్చర్యం కలిగింది" అని శేఖర్ కమ్ముల అన్నారు.
ప్రస్తుతం చిత్రీకరణ దశలో ఉన్న 'కుబేర' చిత్రాన్ని ఏషియన్ ఫిల్మ్స్ మరియు అమిగోస్ సంస్థలు సంయుక్తంగా నిర్మిస్తున్నాయి. గత రెండు సంవత్సరాలుగా చిత్రీకరణ జరుపుకుంటున్న ఈ చిత్రం విడుదల తేదీని నిర్మాతలు త్వరలోనే ప్రకటించనున్నారు.
