PV Sindhu: వినోద్ కాంబ్లి పరిస్థితిపై పీవీ సింధు స్పందన
మాజీ భారత క్రికెటర్ వినోద్ కాంబ్లి జీవితంలో చోటుచేసుకున్న ఆరోగ్య సమస్యలు, ఆర్థిక కష్టాలు ఇటీవలి కాలంలో చర్చనీయాంశమయ్యాయి. సచిన్ టెండూల్కర్‌తో కలిసి రమాకాంత్ ఆచ్రేకర్ స్మారక సభలో పాల్గొన్నప్పుడు కాంబ్లి దుర్బలంగా కనిపించిన వీడియో సామాజిక మాధ్యమాల్లో వైరల్ అయింది. మరో వీడియోలో ఆయన స్పష్టంగా మాట్లాడలేకపోవడం కూడా ఆందోళన కలిగించింది.
ఈ పరిస్థితి పీవీ సింధును కదిలించింది. ఆటగాళ్లకు తమ ఆర్థిక నిర్వహణపై ప్రత్యేక శ్రద్ధ అవసరమని ఆమె ప్రస్తావించారు. "వినోద్ కాంబ్లి వీడియో చూసి నాకు బాధ కలిగింది. ఆటగాళ్లుగా మన సంపాదనను తెలివిగా వినియోగించుకోవాలి. భవిష్యత్తులో ఉపయోగపడే విధంగా పెట్టుబడులు పెట్టడం అత్యంత అవసరం. అవసరంలేని ఖర్చులు తగ్గించుకోవాలి" అని ఆమె అభిప్రాయపడ్డారు.
ఆర్థిక సవాళ్లు ఆటగాళ్లకు సాధారణమని, అయితే అవగాహనతోనే వాటిని ఎదుర్కోవాలని సింధు సూచించారు. "ఫామ్ లో ఉన్నప్పుడు ఆదాయం సమకూరుతుంది. కానీ ఆర్థిక నిర్వహణలో నిర్లక్ష్యం చేస్తే, అది భవిష్యత్తులో సమస్యలకు దారి తీస్తుంది. పన్నులు చెల్లించడం, ఖర్చులను నియంత్రించడం అనివార్యమైన అంశాలు. నా ఆర్థిక వ్యవహారాలను నా తల్లిదండ్రులు నిర్వహిస్తుంటారు. ఇప్పటివరకు ఎలాంటి ఆర్థిక కష్టాలు ఎదుర్కొన్న సందర్భం లేదు. ఈ విషయంలో నేను ఎంతో కృతజ్ఞురాలిని" అని సింధు వివరించారు.
డిసెంబర్‌లో వివాహం చేసుకున్న సింధు, ప్రస్తుతం 2025 ఇండియన్ ఓపెన్‌కు సన్నద్ధమవుతూ, మెరుగైన ప్రదర్శన కోసం కృషి చేస్తున్నారు.
