Pushpa-2: పుష్ప-2 ట్రైలర్ విడుదల బీహార్ గడ్డపై... అల్లు అర్జున్ అనౌన్స్ మెంట్
- అల్లు అర్జున్-సుకుమార్ కాంబోలో పుష్ప-2
- నవంబరు 17న ట్రైలర్ విడుదలకు ముహూర్తం ఖరారు
- బీహార్ రాజధాని పాట్నా వేదికగా ట్రైలర్ రిలీజ్ ఫంక్షన్
- ఉత్తరాదిపై కన్నేసిన పుష్పరాజ్
టాలీవుడ్ హీరోలు తమ పరిధిని మరింత పెంచుకునే పనిలో పడ్డారు. రామ్ చరణ్ తన గేమ్ చేంజర్ టీజర్ ను యూపీ రాజధాని లక్నోలో విడుదల చేయగా... ఇప్పుడు అల్లు అర్జున్ కూడా ఉత్తరాదిపై కన్నేశారు. పుష్ప-2 ట్రైలర్ ను బీహార్ గడ్డపై విడుదల చేయాలని నిర్ణయించారు.
పుష్ప-2: ది రూల్ చిత్రం ట్రైలర్ ను నవంబరు 17న పాట్నాలో విడుదల చేస్తున్నామని అల్లు అర్జున్ సోషల్ మీడియా వేదికగా ప్రకటించారు. ఈ ప్రకటన వచ్చిందో లేదు, బన్నీ ఫ్యాన్స్ సంబరాలు షురూ చేశారు. ఫేస్ బుక్, ట్విట్టర్ లో ఎక్కడ చూసినా పుష్ప-2 ట్రైలర్ గురించే చర్చ నడుస్తోంది.
అల్లు అర్జున్-సుకుమార్ కాంబోలో వచ్చిన పుష్ప చిత్రం ఎంతటి ఘనవిజయం సాధించిందో ప్రత్యేకంగా చెప్పనక్కర్లేదు. ఇప్పుడు పుష్ప-2 మూవీ... తొలి పార్టును మించిపోయేలా ఉంటుందని చిత్రయూనిట్ కాన్ఫిడెంట్ గా చెబుతోంది. దానికి తగ్గట్టే మీడియాలోనూ, సోషల్ మీడియాలోనూ పుష్పరాజ్ బజ్ ఓ రేంజ్ లో కొనసాగుతోంది.
ఇప్పుడు బీహార్ రాజధాని పాట్నాలో ట్రైలర్ రిలీజ్ ప్లాన్ చేయడం ద్వారా మేకర్స్ తమ పంథాను స్పష్టం చేశారు. ఆలిండియా లెవెల్లో ఓపెనింగ్స్ కొల్లగొట్టాలన్నదే వారి ఉద్దేశమని అర్థమవుతోంది. అందుకే పుష్ప-2 చిత్రాన్ని ఉత్తరాది ఆడియన్స్ కు మరింత చేరువ చేసేలా ఈవెంట్లు నిర్వహిస్తున్నట్టు తెలుస్తోంది.
కాగా, మైత్రీ మూవీ మేకర్స్ బ్యానర్ పై తెరకెక్కుతున్న ఈ భారీ చిత్రం డిసెంబరు 5న వరల్డ్ వైడ్ గ్రాండ్ గా రిలీజవుతోంది. ఇందులో అల్లు అర్జున్ సరసన రష్మిక మందన్న కథానాయిక కాగా... తొలిపార్టులో చివర్లో వచ్చి అదరగొట్టిన ఫహాద్ ఫాజిల్... సెకండ్ పార్టులో ఫుల్ టైమ్ ఊపేయనున్నాడు. ఈ చిత్రానికి దేవి శ్రీ ప్రసాద్ సంగీతం అందిస్తున్నాడు.
పుష్ప చిత్రంలో సమంత ఐటమ్ సాంగ్ ఎంత హిట్టయిందో అందరికీ తెలిసిందే. ఇప్పుడు పుష్ప-2లో ఐటమ్ సాంగ్ ను శ్రీలీలపై తెరకెక్కిస్తున్నారు. 'కిస్సిక్' అంటూ సాగే ఈ సాంగ్ పై అభిమానుల్లో అంచనాలు భారీగానే ఉన్నాయి.
