Dushara Vijayan: దుషారా విజయన్ కి పెరుగుతున్న క్రేజ్!

• 2019లో ఎంట్రీ ఇచ్చిన దుషారా 
• కెరియర్ పరంగా కలిసొచ్చిన 2024
• ఇమేజ్ పెంచేసిన రాయన్ - వేట్టయన్ 
• చేతిలో విక్రమ్ సినిమా 'వీర ధీర శూరన్'

---

తమిళ ఇండస్ట్రీలో ఈ మధ్య కాలంలో ఎక్కువగా వినిపిస్తున్న పేరు 'దుషారా విజయన్'. 'రాయన్' .. 'వేట్టయన్' సినిమాల రిలీజ్ తరువాత నుంచి ఆమె పేరు అందరి నోళ్లలో నానుతోంది. తమిళనాడులోని 'దుండిగల్' ప్రాంతానికి చెందిన దుషారా, 2019లో ఎంట్రీ ఇచ్చింది. ఆ తరువాత  నుంచి ప్రేక్షకుల దృష్టిని తన వైపుకు తిప్పుకుంటూ, తన ఇమేజ్ ను పెంచుకుంటూ వెళుతోంది.సాధారణ కుటుంబానికి చెందిన యువతి పాత్రలలో దుషారా ఇట్టే ఒదిగిపోతోంది. ఈ తరహా పాత్రలలో ఆమె నటన ఆడియన్స్ కి వెంటనే కనెక్ట్ అవుతుందని నిరూపించిన సినిమానే 'రాయన్'. ఈ సినిమాలో ధనుశ్ చెల్లెలిగా అసమానమైన ఆమె నటన ప్రేక్షకులకు అలా గుర్తుండిపోతుంది. అంతటి సహజంగా ఆమె ఆ పాత్రకి జీవం పోసింది. ఆ సినిమా తరువాత ఆమె గురించి సెర్చ్ చేసినవారు ఎక్కువేనని చెప్పాలి. ఆ సినిమానే ఆమెకి 'వేట్టయన్'లో అవకాశం దక్కేలా చేసింది.'వేట్టయన్'లో దుషారా ఓ సాధారణమైన స్కూల్ టీచర్ పాత్రను పోషించింది. ఇందులో అన్యాయాన్ని... అవినీతిని ధైర్యంగా నిలదీసే పాత్రలో ఆమె కనిపిస్తుంది. ఈ కథకు ఈ పాత్రనే కీలకం. కథ అంతా కూడా ఆమె పాత్రను ఆధారంగా చేసుకునే నడుస్తుంది. అలాంటి ఈ సినిమాలో ఆమె నటనకి ప్రశంసలు దక్కాయి. దాంతో ఇప్పుడు ఆమె డిమాండ్ పెరిగిపోయిందని టాక్. విక్రమ్ సినిమా 'వీర ధీర శూరన్' తో పాటు, మరికొన్ని ప్రాజెక్టులు ఆమె చేతిలో ఉన్నాయి. మొత్తానికి దుషారా దూకుడు పెరిగినట్టేనని చెప్పుకోవాలి.