Harbhajan Singh: పాక్ జర్నలిస్ట్‌కు హర్భజన్ అదిరిపోయే కౌంటర్
- భజ్జీ బౌలింగ్‌లో అఫ్రిది సిక్స్, ఫోర్ కొట్టిన వీడియోను షేర్ చేసిన పాక్ జర్నలిస్ట్ ఫరీద్‌ఖాన్
- ఇందుకోసమే భారత జట్టు పాక్ రానంటోందని ఎద్దేవా
- అసలు విషయం అది కాదంటూ ఫొటోను షేర్ చేసిన హర్భజన్
తన బౌలింగ్‌లో షాహిద్ అఫ్రిది సిక్స్, ఫోర్ కొట్టిన వీడియోను షేర్ చేసిన చేసిన పాక్ జర్నలిస్ట్ ఫరీద్‌ఖాన్‌కు టీమిండియా మాజీ బౌలర్ హర్భజన్ సింగ్ ‘ఎఫ్’ అంటూ ఘాటుగా కౌంటర్ ఇచ్చాడు. ‘ఎఫ్’ అంటే ఏదేదో ఊహించుకోవద్దంటూ భజ్జీ చేసిన ఎక్స్ వైరల్ అవుతోంది.
ఇంతకీ ఏం జరిగిందంటే.. వచ్చే ఏడాది పాకిస్థాన్ ఆతిథ్యం ఇస్తున్న చాంపియన్స్ ట్రోఫీ కోసం పాక్ వెళ్లేందుకు భారత్ నిరాకరించింది. ఆటగాళ్ల భద్రతకు ప్రాధాన్యమిచ్చే బీసీసీఐ భారత జట్టును పాక్ పంపేది లేదని తేల్చి చెప్పింది. ఈ నేపథ్యంలో పాకిస్థాన్ జర్నలిస్ట్ ఫరీద్‌ఖాన్.. భారత జట్టు తమ దేశం వచ్చి ఆడాలని, తాము భద్రత కల్పిస్తామని అన్నాడు. ఈ సందర్భంగా హర్భజన్ సింగ్ బౌలింగ్‌లో పాక్ మాజీ బ్యాటర్ షాహిద్ అఫ్రిది సిక్స్, ఫోర్ కొట్టిన వీడియోను షేర్ చేస్తూ.. ‘‘ఇందుకేనా మీరు పాకిస్థాన్ రావడానికి ఇష్టపడడం లేదు. దీనికి భద్రతా కారణాలను సాకుగా చూపిస్తున్నారా?’’ అని రాసుకొచ్చాడు.
దీనికి భజ్జీ కౌంటర్ ఇస్తూ.. పాకిస్థాన్‌కు భారత జట్టును పంపకూడదంటూ బీసీసీఐ తీసుకున్న నిర్ణయం సరైనదేనని పేర్కొన్నాడు. గతంలో ఏం జరిగిందో ఒకసారి వెనక్కి తిరిగి చూసుకోవాలని సూచించాడు. భారత జట్టు పాకిస్థాన్ రాకపోవడానికి కారణం అది కాదని, క్రికెట్‌లో గెలుపోటములు చాలా సహజమైన విషయమని పేర్కొన్నాడు. అయితే సరైన కారణం ఇదేనంటూ.. ‘‘నేను ఇక్కడ ఒక ఫొటోను షేర్ చేశా (క్రికెటర్లపై ఉగ్రవాదులు కాల్పులు జరుపుతున్న ఫొటో). దీనిని గుర్తు పట్టారా ఎఫ్.. అయ్యో.. ఎఫ్ అంటే మరేదో అనుకునేరు.. అది మీ పేరు (ఫరీద్‌ఖాన్). అంతే, మరోలా అనుకోవద్దు. నేనేం చెప్పాలనుకున్నానో మీకు ఇప్పటికే అర్థమై ఉంటుందని అనుకుంటున్నా’’ అంటూ దిమ్మదిరిగే కౌంటర్ ఇచ్చాడు. 